«Javier Zubimendi zuzendari zela hasi ginen Kantuz Eguna ospatzen. 15 bat urte izango dira. Javierrek gure eguna jarri behar genuela esan zuen, bazkide eta kolaboratzaileei zuzendua zerbait egin behar genuela zioen eta hala hasi ginen», gogoratzen du Mariaxun Casado Kantuz Abesbatzako lehendakariak. Gaur izango da Kantuz Eguna, hau da, abesbatzaren eguna, eta urtero bezala, bereziki bazkide eta kolaboratzaileei zuzendutako emanaldia prestatu dute. Aurtengoa, ordea, emanaldi berezia izango da, Kantuzek 20 urte betetetzen baititu. Hori horrela, 15 abestiko emanaldia antolatu dute eta parte hartuko dute urte guzti hauetan zuzendari izandako lau kideek, hala nola, Jaione Escudero, Javier Zubimendi, Amaia Sasiain eta Igor Arroyok. Horrez gain, Anonimuss Hari Laukotea ere izango da gonbidatu gisa. Casadok azaldu du ilusioz prestatutako emanaldia dela eta espero dutela erantzuna ere halakoa izatea. «Gainera, aurten deialdi berezia egiten diegu urte hauetan koruko partaide izan direnei; gauza bategatik edo besteagatik utzi egin behar izan dutenei. Oso gustoko izango genuke gaur gurekin batera etorriko balira». Emanaldia Milagrosa Aretoan izango da, 19:45etan.
15 abesti eta Anonimuss Hari Laukotea gonbidatua
Kantuz Abesbatzak gaurko prestatu duen emanaldian 15 abestiz gozatzeko aukera izango da. Lehenengo lau abestiak Kantuzek eskainiko ditu, abesti bakoitza zuzendari ezberdinak zuzenduta, hau da, Jaione Escuderok, Javier Zubimendik, Amaia Sasiainek eta Igor Arroyok. Ondorengo bost abestiak ere Kantuzek abestuko ditu eta Arroyok, egungo zuzendariak izango du batuta. Emanaldiaren bigarren zati honetan estreinaldi bat izango da, J. Olaizola abesbatzako kideak konposatutako Adio ene lur abestia. Emanaldiak hirugarren zati bat izango du eta bertan parte hartuko du gonbidatutako taldeak: Anonimuss Hari Laukotea. Bi abesti eskainiko dituzte eta ondoren, Kantuz Abesbatzakoak taulagainera igo eta elkarrekin egitaraueko azken lau abestiak interpretatuko dituzte.