Nondik zoaz Ereñotzutik Fagollagara? oinezko bidetik

ARNAITZ LASARTE

Ereñotzu eta Fagollaga arteko oinezko bide berriaren obrak amaitzear daude. Egunero-egunero errepide bazterretik ibiltzen diren ibiltariek aste gutxi barru izango dute lasai paseatzeko bidea prest. Orain arte, kamioi eta kotxeekin zituzten arriskuekin amaitzeko ezinbesteko neurria zela uste zuten ereñotzuarrek. Nahi baino gehiago luzatu badira ere, iazko azaroan hasitako obrak amaitzen ari dira jadanik.
Eguraldi txarrak hala behartuta,  abendutik mar­txoa­ren amaiera arte obrak geldirik egon ziren. Unai Erroizenea Hernaniko Uda­leko zinegotziak azaldutakoaren arabera, eguraldi txarraren ondorioz ur asko joan zen menditik behera eta horrek lur jauzi bat edo beste eragin zituen. Eskollera batzuk egin behar izan zituzten eta ho­rrek gainerako egin beharrekoa atzeratu du. Geldirik ego­tea beharrezkoa zen hala ere. «Ezponden estabilitatea konprobatu ahal izan dugu bitartean, eta gainera, segurtasunaren aldetik, baldintza txarretan lan egitea saihestu dugu».
Martxoaren 29an izan zu­ten segida lanek eta oso gutxi falta zaie bukatzeko. Bidean azkeneko materia kapak bota­tzea eta ur tuberientzako arketa batzuk egitea. Oinezko bi­dearen obrak aprobetxatu baitira Ereñozu eta Fagollagako saneamendua burutzeko, etxe­e­tako ur zikinak Loiolako araztegira bideratzeko, alegia. Lan hauek egiteko lurra lehor egotea ezinbestekoa denez, eguraldiaren menpe daude lanak amaitzeko.

2006an lehen urratsak
Oinezko bide seguru baten beharra ikusirik, Ereñotzuko ordezkari batzuk eta proiektuaren arduradunak, 2006an bisitatu zuten Fagollaga eta Ereñotzu arteko bide zaharra. Orduan hasi ziren zehazten oinezko bidearen helburuak, diseinua eta bera eraikitzeko obren prozedura.
Zati horretako ibaiertzeko  bejetazioaren  kalitatea eskasa ze­­la izan zen bisita hartan ateratako beste ondorio nagusia. Aka­ziek, platanoek eta insigne pinuek osatzen zuten bertako landaretza.  Gauzak horrela, Ere­­ñotzuko auzotarrei bertako be­jetazioa hobetzeko neurriak har­tzea proposatu zi­tzaien. Hau da, bertakoak diren haltz beltza, lizarra eta haritzak sar­tzen joatea.

100 haltza landatzea
aurreikusia
90 zuhaitz inguru moztu dira oinezko bidea egin ahal izateko. Erroizeneak argitu digunez, zuhaitz hauen hiru laurdenak espezie aloktono inbadatzaileak izan dira, akazia eta platanoak. Aitortu digu Uru­mea ibaia LIC (Lugar de Im­por­tancia Comunitaria) bat de­la. Hala ere, bejetazio aldetik nahi­­ko degradatua dagoela azpimarratu du.
Gainera, obra amaieran, oi­nez­ko bidearen ondoan 100 hal­tza landatzea aurrekusia dagoela gogorarazi digu Erroi­ze­neak, «haltza erriberatako ber­tako es­peziea da eta haltzadiek ematen die benetako balioa ibaier­tzei, haritza eta lizarrekin batera».