Hernaniko bi bertsolari talde lehian izango dira ostiralean; izan ere, 30garren Gipuzkoako Eskolarteko Bertsolari Txapelketako lehenengo kanporaketa jokatuko da. Saioa Bitari kultur etxean izango da arratsaldeko 15:00etan.
Aurtengo txapelketan bi maila bereiziko dira. Batetik 14 urte arteko gaztetxoak taldeka arituko dira, eta bestetik 14tik 18ra bitartekoak, banaka.
Hernaniko lehenengo kanporaketa horretan parte hartuko dutenak 14 urte arteko gaztetxoak izango dira eta nagusiak aurreragoko kanporaketa batean sartuko dira txapelketan.
Horrez gain, bertso eskolako kideek bertsopaperen txapelketan parte hartuko dute.
Finala Lezon
Maiatzaren 28an
Hernaniko kanporaketak Eskualdetako sailkapen faseari emango dio hasiera. Ordizian, Arrasaten eta Azkoitian jokatuko dira beste kanporaketak, eta onenak Lezoko finalera pasako dira. Gaztetxoen artean lau talde onenak pasako dira finalera, eta 14 urtetik 18 bitartekoen artean, 8 bertsolari izango dira finalean.