Garaipen gazia atzo Landaren

Estatuko Ohorezko A mai­lara CAU Valentzia igoko da, deskontuko laugarren minutuan lortutako zigor golpe bati esker. Hernanik azken minuturaino borrokatu zuen, eta zirrara batean eduki zuen Landarera hurbildutako jende uholdea. Azkeneko txalo za­parradak argi utzi zuen zaleak oso harro daudela jokalariek aurten egin duten lanarekin.

Hernanik bost puntuko al­deari buelta eman behar zion (18-13 Valentzian), eta lau puntukoa lortu zuen (13-9 Her­nanin) atzo Landaren. Va­len­tziak zigor golpez lortu di­tu play offeko puntu guztiak (27); denak So­rribek sartuak (9 zigor golpe). Atzo lau huts egin zituen, baina in­por­tan­teena sartu; azkenekoa.    

«Saiatu gara, baina defentsa oso ona egin digute»
Partidu gogorra jokatu zuten atzo bi taldeek. Aurrean va­lentziarrak gehixeago izan ziren, eta Hernanik asko sufritu zuen, hautsi ezinean ibili baitzen valentziarren defentsa.

«Defentsa ona, eta zigor golpeak; hori zen euren estrategia, eta ondo atera zaie».

Azken minutuak zirraragarriak izan ziren. 10-6, eta Hernani entsaioaren bila; CAU zigor golpearen ehizan.

10 minutu falta zirela CAUk bi zigor golpe. Jendeak dardar. Biak huts egin. Her­na­nik puntuak behar zituen, eta 5 minuturen faltan, entsaioa 3 metrora izan zuen, huts. Zigor golpea Hernaniren al­de; Genuak barrura, eta Landaren obazioa. Igoera esku eskura zuten hernaniarrek, baina So­rri­bek hautsi zuen ametsa, 40 metro baino gehiagotik.

Ezertarako betarik ez ze­goen. Hernanik gertu izan du, oso gertu, igoera. Joxe Elose­gik taldearen urte guztiko la­na go­rai­patu zuen: «pena da, jo­ka­la­riek igo nahi zutelako, eta guk ere bai. Hala ere, firmatuko nu­ke urtero honaino iristea; hu­rrengo urtean ere taldea man­tendu egingo du­gu, eta goian ibiliko gara».