Apirilaren 20az geroztik Ogasunarekin gure diru-kontuak zertan diren argitzen hasteko garaian gaude. 2009ko ekitaldiari dagokion Errenta Aitorpenari lotutako kanpaina martxan da pasa den asteartetik. Zenbait berrikuntza dakartza aurten.
Egin, hautazkoa izan arren
Badira Errenta Aitorpena egitera derrigortuak ez dauden herritarrak. Horregatik edo, askok aitorpena ez egitea erabakitzen dute. Aldiz, kasu honetan, iaz lan egin eta jasotako diruan atxikipena izan duenari aitorpena egitea aholkatzen zaio. Hartara, Ogasunetik dirua jasotzea egokituko zaio, gutxieneko sarrera-mugara ailegatu ez denari.
Edozein kasutan, aitorpena aurten egin nahi edo behar dutenek, lehen zereginetako bat zergen inguruko informazioa biltzea izango da. Horretarako bide desberdinak daude aukeran. Pasahitz operatibo batekin izan liteke norbere diru-sarrera, gastu, atxikipen eta abarren berri. Pasahitza Internet bidez eska liteke eta Ogasuneko bulegoetan jaso.
Edota zuzenean, aipatu bulegoetara joanda. NAN originala eta haren kopia besterik ez dira aurkeztu behar. Internet bidez eskatuta edota 902 100 040 begin_of_the_skype_highlighting 902 100 040 end_of_the_skype_highlighting telefono zenbakira deituta ere, etxera bidaliko digute posta bidez. Aitorpena finantza entitateen bidez egin nahi duenak baimen eredu bat beteta entitateari zerga informazioari buruzko datuen berri emateko aukera eman diezaioke herritarrak.
Zergabidea programa
Aurtengorako azpimarratzeko moduko bi berrikuntza daude. Batetik, Ondarearen gaineko Zerga indargabetu dute eta ondorioz, ondarearen aitorpenik ez da aurkeztu behar aurten.
Bestalde, aitorpena Internet bidez egin ohi duenak ohartuko denez, Zergabidea izeneko errenta programa bat eta bera erabili ahal izango du. Aipatu moduan Internet bidez soilik, desagertu baita diskete bidez egiteko aukera. Hainbat eredu integratzen ditu, honakoak: eredu informatiboak, atxikipenenak, eta sozietate zergarena. Ogasuneko web orrialdean eskura liteke Zergabidea programa.
Errenta euskaraz, nik ere bai
Ogasunarekin dugun hitzordua, eta Errenta Aitorpena zer hizkuntzatan egin, norbere aukera da hori. Euskaraz egin nahi duenak kontuan hartu beharko ditu jarraian datozen gomendioak.
Errenta mekanizatua egin behar duenak telefonoz edo Internet bidez hitzordua finkatzerakoan aitorpena euskaraz egin nahi duela adierazi beharko du. Foru Aldundiko bulegoetan aitorpen mota hau egiterakoan, une horretatik aurrera harremanak euskaraz bideratu nahi diren edo ez ere aukeratu ahal izango du herritarrak. Autolikidazio proposamena etxean jasotzen duenak, norbera ados dagoela berresterakoan zein hizkuntzatan jaso adierazi dezake.
`Buruntzaldea.org´
Buruntzaldeko udalek urteak daramatzate, herritarrak Errenta Aitorpena euskaraz egitera sustatzen. Bailarako udalerrietan pixkanaka gorantz doa, aitorpena aipatu hizkuntzan egitea hautatu duen herritar kopurua. Iaz hiru mila herritarren muga gainditu zuen. 3.507 aitorpen bideratu ziren euskaraz, Buruntzalde osoan aurkeztutako %9,21.
Datuak, herriz herri
Herriz herri honako datuak jaso ziren: Andoainen 701 (%8,59), Astigarragan 229 (%8,95), Hernanin 1.271 (%12,09), Lasarte-Orian 508 (%5,03), Urnietan 304 (%9,20) eta Usurbilen 494 (%14,41). Buruntzaldeko udalen iazko erronka, errenta aitorpenen %10 euskaraz aurkeztea zen. Aurten, %15eko mailara ailegatu nahi dute.
Buruntzaldeko euskaldun kopurua %50 ingurukoa izanik, eskualdeko udalek sustapen lanarekin jarraitzeko asmoa dute, asko baitira euskaraz egin dezaketenak. Buruntzaldeko udalek alor honetan burutu duten orain arteko lana euskara.buruntzaldea.org web orrialdean ezagutu daiteke.