Mañel Aizpurua, Olatz Altuna eta Maitane Damborena igerilari hernaniarren denboraldia punturik garrantzitsuenetakora heltzen ari da egun hauetan. Asteburu honetan eta hurrengoan jokatuko dituzte Espainiako Igeriketa Open Absolutua eta Ohorezko Mailako Estatuko Kluben Kopa hurrenez hurren, denboraldiko helbururik nagusienetakoak direnak.
Igandera arte Malagan
Estatuko onenekin lehiatzen
Ostegunean hasi zen Malagako txapelketa eta igandera arte egongo dira Andaluziako hirian konpetitzen. Orain arte Olatz Altunak lortu du markarik onena, libre estiloan 50 metroko proban seigarren sailkatzea lortuta. Mañel eta Maitane beraien disziplinetan B finaletara iritsi dira. Lehenengoak laugarren amaitzea lortu zuen libre estiloko 200 metroetan, eta Maitanek bosgarren egin zuen distantzia berean, baina bizkar estiloan.
Buru belarri entrenatzen
Txapelketa honetara ahalik eta forma onenean iristeko intentzioz, igerilari hernaniarrak buru belarri aritu dira entrenatzen azken hilabeteetan. Mañel Aizpurua, adibidez, Font Romeun entrenatzen aritu da azkeneko asteetan, bertako errendimendu altuko zentruan. Eliteko kirolariei zuzendutako zentru honetan, alturan entrenatzeko aukera izan du bere prestakuntzari azkeneko ukitua emateko.
Zaragoza eta Madrileko
testetan oso ondo
Lehengo astean Zaragozan eta Madrilen izan ziren Malagako zita garrantzitsu honetarako bere burua probatzekotan. Bertan, Espainiako irekian izango dituzten aurkari gogorrenen kontra lehiatzeko aukera izan zuten, eta emaitza oso onak lortu zituzten. Beraz, Mañel Aizpurua eta Olatz Altunak, beraien disziplinetan Malagan aurreneko postuetan sailkatzeko aukerak dituztela uste dute.
Maitanek, berriz, orain dela hilabete bat jokatu zuen bere adinekoentzako Espainiako Txapelketa eta emaitza bikainak lortu zituen. Malagako adin guztientzako txapelketa honetan parte hartzen ari da baina bere helburuak oso bestelakoak dira beste bi igerilari hernaniarrekin alderatuta. Maitane presiorik gabe dijoa Malagara, horrelako txapelketetan esperientzia pilatzea izango du helburu nagusitzat eta ahal badu eta bere mailarik onena emanez gero, agian final baterako sailkatzea lortzeko esperantza du.
Igerilari hernaniarrak Espainiako txapelketan asteburuan
Ostegunean hasi zen igeriketako Espainiako Ireki Absolutua, Malagan. Mañel Aizpurua, Olatz Altuna eta Maitane Damborena ari dira parte hartzen txapelketa honetan eta orain arte nahiko paper ona egin dute. Txapelketa internet bidez ikusi daiteke www.rfen.es
helbidean.
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!
Egin zaitez KronikaKide!