Jaia, eguerdiko 12:00etan hasiko da, eta Plaza Berrin egingo da (eguraldi txarra eginez gero, Atsegindegin). Bertan herrialde askotako mokadu goxoak egongo dira; horien artean, Ekuador, Maroko, Kolonbia, Kuba, Nikaragua, Argentina, Txina, Peru, Bolivia, Honduras, Txile zein Moldaviakoak. Proba daitezkeen plateren artean, Kubako congri-a, Marokoko kus-kus-a, Kolonbiako arroza oilaskoarekin, janari txinatarra eta Argentinako mate-a aurkitu daitezke, besteak beste. Plater horiek guztiak, Hernaniko etorkinek egingo dituzte. Janaz gain, zer edan ere izango da, eta hau guztia eskuratzeko prezio sinbolikoa duten txartelak salduko dira bertan. Bestetik, Musika Eskolako kideek alaituko dute giroa euren musikarekin. Antolatzaileen esanetan, ekitaldiak duen helburu nagusia bazter askotako platerak dastatzea da; eta honekin batera, kohesio sozialean aurrera pausuak ematea, elkartasuna zabaltzea, eta diskriminazioa ukatuta eskubideen berdintasuna jorratzea.
Jai solidarioa
Munduko leku ezberdinetatik etorri eta Hernanin bizi den jendea izango da igandeko protagonista. Hernanin, atzerritar asko dago; gehiengoak, latindarrak dira. Horien artean gehienak Ekuadorretik etorritakoak dira, 149 hain zuzen ere. Bestetik, marokoar ugari ere bizi da Hernanin, zehazki 127. Hauek, eta baita beste herrialdeetatik etorritakoek ere (Kolonbia, Kuba, Nikaragua, Argentina, Txina, Peru, Bolivia, Honduras, eta abar) sukaldari jantzia hartu eta euren herrialdeetan dasta daitezkeen plater goxoak prestatuko dituzte igandean.
Antolatzaileek adierazi nahi izan dute, jai gastronomikoan parte hartzea ere, elkartasun keinua dela, jendea ezagututa, elkartasuna bultzatzea lortzen baita. Hori dela eta, Amher-etik jendea parte hartzera bultzatu nahi dute; horrela, Hernanin bizi diren etorkinei onarpena eta elkartasuna erakusteko.
Esan bezala, herrialde askotako jendea Hernanira etorri da bizitzera, arrazoi ezberdinak direla eta. Hauetako bi protagonisten istorioa ezagutu dugu, eta igandean prestatuko duten errezetari buruz ere, datu batzuk eman dizkigute. Bata, Silvia da, ekuadortarra; eta bestea, Fatima, marokoarra. Biek azpimarratu dute Hernaniko AMHER elkartekoek (ekitaldiko antolatzaileek) asko lagundu dietela, arlo askotan; batez ere, Hernanira iritsi berritan.