Paella, desfile eta kontzertuak gaur, Olinpiadak hasteko

Martxoaren 21ean Ate­nas­tik suziriarekin abiatu ziren bi lasterkariek beraien hitza bete du­te. Apirilaren 24arekin ba­te­ra, Su Olin­pikoa Hernanira iritsi da, Herri Olinpiadei hasiera emateko prest.
Dena dela, hemen ere ez dira azken orduko ustekabekoez libratu. Azken komunikatuan diotenez, atzo kontrol batean geratu zituzten herrirako sarreran: «Suziri Olinpi­koa kontrolean gelditu dute Sorgin­txu­lon, eta paperak eskatu dizkiete lasterkariei. Poliziei arraroa iruditu zaie halako koadrila junta­tzea: Olin­poko jainkoak, Alfa Omegako zazpi koadrila, Mateo Txistu, txipiroiketako arrantzaleak, So­ma­liako piratak, euskaltzale na­far ba­tzuk, usurbildarrak baldeak eskuetan dituztela...». Dena dela, azaldu dute atzo goizaldean hasi zirela lehenengo lasterkariei pasa­tzen uzten, eta gaurko guztia prest izango dutela.

30 paella lehian
Guztia ondo bidean, goizeko 10:00etan hasiko dira Olin­pia­dak Tilosetan. Lehenengo eguneko proba paella txapelketa izango dute izena eman duten 30 taldek, hau da, 400 bat per­tsonek. Paellak 14:00e­ta­rako bu­ka­tu beharko dituzte, ordu ho­rretan hasiko baitira epaimahaikideak talde bakoitzak egindako paellak pro­batzen eta puntuatzen. On­doren, 15:00ak aldera, bazkaria egingo dute Tilosetan bertan.
Talde bakoitzak kanping-gasa edo berotzeko beharrezkoa den beste zerbait eraman beharko dute. Paella egiteko paellera eta osagaiak ere bai; arroza salbu, bertan emango baitzaio talde bakoitzari. Talde bakoitzak nahi izanez gero, mahaiak, aulkiak... eraman ditzake.

Taldeen aurkezpena
eta kontzertuak
Bazkalostean, arratsaldeko 17:00e­tatik aurrera, taldeak banaka-banaka aurkeztuko dira. Talde bakoitzak prestatu duen ikuskizunarekin goza­tzeko au­ke­ra izango da. Eta guztien aurkezpenak bukatuta, txarangaren erritmora, desfilea egingo dute herrian barrena. 19:00ak aldera izango da. Desfilea bukatzean, Su Olinpikoaren pebeteroa piztuko dute.
Gaueko 20:30ak aldera, Hernaniko taldeen kontzertuak izango dira, hala nola, Sindrome de Parker, Despervicio, Trifulka eta BH Roja.