Inoiz ez da txarra izaten langabezi datuak jaitsi egin direla entzutea, eta gutxiago, jendea krisiaz hainbeste ari den honetan. Hernanin langabeziak behera egin du, eta hori izan liteke konfirmazioa, gorako joera apaltzen ari zela esaten zuena. Oraindik, hala ere, 1.140 langabetu daude Hernanin, aspaldiko gehiena; iaz garai honetan baino 174 gehiago, eta azken trimestrean baino 67 gehiago.
Zerbitzuetan dago langabetu gehien, 699 hain zuzen; industrian 258 daude; eraikuntzan 136; nekazaritzan 7.
Mila langabetutik gora,
2009ko abuztutik
Mila langabetutik gora daude Hernanin, azkeneko zortzi hilabeteetan. 2009ko abuztuan iritsi zen kopuru horretara (1.008 langabetu), eta ez da jaitsi oraindik. Lehengo hilean, otsailean, jo zuen goia kopuruak, 1.144, eta martxoan behera hasi da.
Gipuzkoan 41.679 langabetu, otsailean baino gehiago
Estatuko Enpleguaren Zerbitzu Publikoak (SPEE, lehengo INEM) emandako datuen arabera, Gipuzkoan igo egin da langabezia, gutxi bada ere (otsailean baino 216 langabetu gehiago daude); guztira 41.679 langabetu. Kontratu berriak 17.142 izan dira.
Kontratu berriak gora
Hernanin, kontratu berri kopuruak gora egin du. Kontratuei dagokienez, 389 kontratu berri izan dira martxoan, otsailean baino 18 gehiago, eta joan den abenduan baino 29 gehiago. Eta igoera nabarmena izan da iazko martxotik, 108 kontratu gehiago izan dira aurten. Egin diren kontratu gehienak denboraldi batekoak izan dira, 361; eta zerbitzuen alorrean egin dira gehien, 290.