Langileko gurasoen borondatea errespetatzeko eskatu zuen joan den astean Gasteizko Parlamentuak, eta Hernanin egitekoa duten fusio prozesutik kanpora geratzeko eskubidea emateko, berak hala nahi badute. Parlamentuak Gobernuari egindako eskaera da hori, alderdi politiko gehienek babestu zutena, PSOE-EE eta UPyD alderdiek izan ezik.
Horren aurrean, Langilek Manifa-Festa antolatu du, Parlamentuaren erabakia ospatzeko, eta Hezkuntza Sailari eskatzeko, erabakia berriz planteatu dezala.
Manifa-Festa 12:00etan da, eta errebindikazioa eta festa nahasian izango ditu: kale buelta, bertsolariak, pintxoak, globoak...
«Argudio politikoak ditugu orain, pedagogikoez gain»
«Irribarrea eta poza» nagusi direla azaldu zuten Langileko kideek, Parlamentuaren gehiengoak babesa emateak «argudio politikoak» ematen dizkielako, «argudio pedagogikoez gain». «Gobernuak ezin dio bizkarra eman Parlamentuaren eskaera honi, eta eskatzen diogu erabakia berriz aztertu dezala». Hernanik DBHko bi proiektu izan ditzakeela defendatu zuten atzoko prentsaurrekoan, eta horren alde egingo dutela hemendik aurrera.
61 ikasleren matrikulak, Notaritzan
Bitartean, Langileko 12 urteko ikasle guztien matrikulazioak (61 denera, %100) Notaritzan daude. Berez DBHko ikastetxe berrian egon beharko lukete matrikulatuta, baina gurasoek Langilen matrikulatu nahi dituzte. «Notaritzan dauzkagu, erakusteko, borondatea badugula seme-alabak matrikulatzeko, baina guk nahi dugun ikastetxean».
«Argiguneak ikusten hasi gara, eta biharko festa, hori ospatzeko da»
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!
Egin zaitez KronikaKide!