Hernaniko Udal Ingurumen Sailak prentsa oharrean dioenez, Udalak ez ditu kobratu kuboak, apirilaren 16tik aurrera hartzeagatik: «gezurtatu egiten dugu Iñaki Arratibel Hamaikabateko zinegotziak prentsan esandakoa. Arratibel jaunak gezurra erabiltzen du, arrazoien faltan, eta horren froga da atzo eta gaur ere poteak banatzen aritu garela, doan».
Prentsa oharrak dioenez, Arratibelek erraza zuen egia jakitea, «bulegora deitu zezakeen, edo Ingurumen Teknikariarekin hitz egin zezakeen. Ordea, prentsara jo du zuzenean gezurra haizatzera. Zergatik? Ez da ulertzen. Arduragabekeria hutsa da. Gezurra erabiliz herrian zurrumurruak zabaltzea eta jendea beldurtzea ez da herriko zinegotzi baten partetik espero dugun jokabidea».
Kubo ia guztiak banatu dira
Bukatu da atez ateko hondakin bilketa egiteko kuboen banaketa, eta ia hernaniar guztiek jaso dute kuboa, %98,5ak.
Atez Ateko bulegotik pasa dira Hernaniko 6.774 familia, eta Izaskun Txintxurreta zinegotziaren iritziz sekulako arrakasta izan da: «Herritarrek bikain erantzun dute. Oraindik hiru aste falta dira Atez Atekoa martxan jartzeko, eta dagoeneko ia familia guztiek dituzte poteak etxean. Horrek asko errazten du Udalaren lana. Jarri genituen epeak betetzen ari gara eta maiatzaren 9rako guztia prest izango dugula aurreratu dezakegu».
«Laukoiztu egin da
autokonpostatze kopurua»
Horrez gain, Ingurumen Sailak azpimarratu ditu etxean konposta egingo duten kopuruak. Atez Atekoa iragarri aurretik 162 familiak konpostatzen zuten; eta apirileko ikastaroa egin ondoren, guztira 677 izango dira konpostatuko dutenak. «Atez Atekoak birziklatze-kultura zabaltzen du eta emaitzak berehala ikusten dira; laukoiztu egin da kopurua. Eta oraindik ez gara telefono kanpainarekin hasi».