Hernaniko Sagarduaren Graziya iritsi da Ingalaterrara ere. Londreseko The Guardian egunkariak Gipuzkoako 10 sagardotegi jo ditu Espainiako Estatuko onenak bezala, eta Top Ten horretan hiru hernaniar aipatzen ditu: Zelaia, Altzueta eta Larre-Gain. Txotx denboraldian Gipuzkoako sagardotegiek duten martxa eta mugimendua azpimarratu ditu egunkari britainiarrak, larunbatean publikatutako bidaiei buruzko gehigarrian.
«Espainiako 10 onenak» bezala jotzen ditu The Guardian-ek, eta denak gipuzkoarrak dira: Astigarragako 6, Hernaniko 3 eta Igeldoko 1. Hernaniko hiru sagardotegiek gustoz ikusi dute euren izena Ingalaterrako egunkari famatuenetako batean.
«Euskal sagardotegiak topera funtzionatzen dute»
The Guardian egunkariak azpimarratzen du Gipuzkoako sagardotegien martxa, txotx garaian. «Britainia Haundian saiatzen gara gure sagardo-etxeen ohitura polita mantentzen, baina Euskal Herrian sagardotegien fenomenoa izugarria da; txotx denboraldian topera funtzionatzen dute; jendea mendira eramaten dute jan, edan eta zoriontsu izatera».
Zelaia, sailkapeneko buru
Zelaia da onena, kazetari ingelesaren arabera. Zelaia talde txikiei eta familientzat egoki jotzen du, etxe-etxeko tratua eta generoa eskaintzen duelako.
Oihana Gaincerain etxeko alaba gustora azaldu da, «gu saiatzen gara denei gertuko tratua ematen, eta ilusioa egiten du kanpokoek gure lana baloratzen dutela ikusteak».
Altzueta da zerrendan zazpigarren, eta besteak beste Florentino Goikoetxearen jaiotetxe gisan aipatzen du, Bigarren Mundu Gerran abiatzaileei muga pasatzen lagundu ziena. Ibon Alkortak «sorpresa» hartu dutela dio: «sorpresa hartu dugu; ez genekien erreportajea egiten ari zirenik ere. Nik uste dut, sektorearentzat albiste onak direla».
Larre-Gain zortzigarren ageri da, aperitibo gisan «antxoak oliotan eskaintzen dituen sagardotegia». Joxe Lasartek dioenez: «horrelako albisteetan ateratzea beti da ona. Jendeak komentatu egin duela konturatu gara, eta hori kaltetarako ez da izango». Ordenean, 10 sagardotegiak hauek dira: Zelaia, Lizeaga, Gurutzeta, Zapiain, Petritegi, Mina, Altzueta, Larre-Gain, Alorrenea eta Calonge. yy