Hamaika telebista, Donostialdeako telebista berriak, ostegunean eman zituen bere lehen pausoak Miramar Jauregian egindako aurkezpenean. Telebista euskalduna, tokikoa, plurala, irekia eta parte-hartzailea izan nahi du Hamaikak, eta helburu horrekin ekingo diote ahal bezain laister, uda baina lehenago izatea nahi dute beraiek, Donostialdean zentraturiko emisioei. Hamaika telebista ikusi nahi dutenek LTDren 23 katea sintonizatuz aurkituko dute kate berri hau. Euskalteleko zuntz optikorako sarbidea dutenek dagoeneko Hamaika ikusteko aukera badute, baina oraingoz Bilboko emisioa helduko da bakarrik Donostialdeako etxeetara.
Sei zutabe garrantzitsuren gainean eraikia
Hamaika telebista sei zutabe garrantzitsuren gainean eraikia izan da. Sei bazkideak EKHE (Gara eta Le Journal) CMN TV (NOTICIAS taldea), EKT (Berria eta Hitzak), Euskaltel, Elkar eta Bainet TV dira. Hala ere, proiektua zabalagoa izatea nahi dute eta horretarako datozen hilabeteetan kapital zabaltzea burutuko dute tokian tokiko enpresa, elkarte edo norbanakoak proiektu honetan parte hartzeko aukera izan dezaten. Hau amaitzean hasiko dira bertako ekoizpen propioekin eta Donostialdean zentraturiko programazioarekin.
Proiektu zabala eta
etorkizunean unibertso
euskaldunera iristeko asmoa
Hamaika telebistaren proiektua oso zabala da eta bere lehen pausoak eman ditu soilik orain arte. Esan bezala, Bilboko telebista katea martxan dago eta Donostiakoa pixkanaka abiadura hartzen ari da. Etorkizunean unibertso euskaldunaren txoko gehienetara iristea da beraien intentzioa. Beste 8 kate sortuko dira hemendik gutxira eta jadanik existitzen diren euskarazko beste telebista kate lokalekin bilatuko diren akordioei esker tokian tokiko telebista sarea osatuko da.
Proiektu berri hau, teknologia berriek ikusleari telebista ikusteko eman dizkien herraminta berrietan oinarritu nahi dute. Naroa Iturri Hamaika Telebistako kazetari eta aurkezle hernaniarraren hitzetan `Hamaikak ikuslea partaide bihurtu nahi du, hauek gaur egunean telebistari eskatzen diotena eskainiaz´.
Kirola, politika, ekonomia, kultura...
Bilboko emisioei orain dela urtebe ekin zioten eta orain artekoaren balorazio ona egin zuten. Hamaika Bilboren programazioak herrien, auzoen eta pertsonen bizitza isladatzea du helburutzat eta honi esker bilboko unibertso euskalduna azaleratzea lortu dute. Donostialdeko Hamaika Telebistak helburu berdinak izango ditu eta bere programazioan kirola, politika, ekonomia, kultura edo gizarte gaiak aurkitu ahal izango dira.
Euskal unibertsoaren
errepresentazio zabala
Miramar Jauregian egindako aurkezpenean euskal kulturaren, kirolaren eta politikagintzaren errepresentazio zabala bildu zen proiektu honi babesa emateko. Bertan izan ziren, besteak beste, Oier Mendizabal pelotaria eta Maialen Lujanbio bertsolaria.
Juan Mari Larrarte, EKT-ko arduradunak hartu zuen hitza aurkezpenean. Bere esanetan Hamaika telebista euskalgintzaren munduan proiektu oso garrantzitsua da «euskaldunok geure sistema komunikatiboa behar eta nahi dugulako». Bere ustez, telebista berri hau sistema hau finkatzeko aurrerapauso garrantzitsua izango da.
Euskal alderdi politiko gehienetako ordezkariak ere bertan izan ziren. Kirolarien artean Mikel Aranburu Realeko kapitainak berea den hamaikagarren dortsaldun Realeko elastikoa oparitu zien Hamaika telebistako ordezkariei.
Aurkezpenean Mikel Astarloza txirrindulariak, Aizpea Goenaga antzerkigileak eta Igor Zalakain sukaldariak hartu zuten hitza Miramar Jauregian bildutako errepesentazio zabal horren iritziaren adierazgarri moduan. Denek telebista eskaintza berri honengatik beraien poza agertu zuten, aurkezpen ekitaldian.