argazkizale guztiek goiz pasa ederra egiteko aukera dute bihar, gustoko duten horretan jardunean; hau da, argazkiak ateratzen. Izan ere, argazkilari profesional, afizionatu, heldu, gazte zein umeentzat Argazki Rallya izango da Hernanin, bederatzigarren urtez.
Izena emateko, bihar goizeko 09:00etatik 10:00etara izango da aukera Udaletxeko arkupe txikian. Helduek 3 euro ordaindu beharko dituzte eta ume eta gaztetxoek, 14 urtera arte, adin hori barne, dohainik izango dute parte hartzeko aukera. Izen ematearen ostean, argazkiak ateratzeko kontuan hartu beharreko sei gaiak zeintzuk diren jakinaraziko dituzte. Hortik aurrera, argazkiak ateratzera.
Hamaiketakoa Txantxangorri elkartean
Argazki Rallya eguerdiko 13:30etan bukatuko da eta tartean atseden txiki bat egiteko aukera ere izango da, Txantxangorri elkartean hamaiketakoa antolatu baitute. Hori 11:30etan izango da.
Argazkilari bakoitzak, ateratako guztien artetik, 6 argazki aukeratuko ditu eta argazki horiek Torres argazkidendan deskargatu beharko ditu astelehen eta asteartean.
Biteriko erakusketaren ondoren, sari banaketa
Apirilaren 26tik 30era, argazkien erakusketa egingo da Biterin. Erakusketaren azken egunean, irabazleei sariak banatuko zaizkie. 20:00etan izango da Udaletxeko Pleno Aretoan.