Jose Ramon Chicak, PSE-EEko Hernaniko bozeramaleak, salatu zuen, Hernaniko Udalak inspektore figura bat sortu nahi duela, «herritarrak eta merkatariak kontrolatzeko». Chicak kezka azaldu du «inspektore horiek konfliktoak sortu ditzaketelako, lehendik ere nahiko polemikoa den Atez Ateko sistema martxan jartzean».
Kontrola, multak eta intimitate galera
Jose Ramon Chicak azaldu du, herritarrak kontrolatu egin nahi dituela Udalak. «Etxebizitza bakoitzak bere gantxoa jarria dauka zabor-zuhaitzean, eta zenbaki bat izango du. Horrela, egutegia ondo betetzen ez duen familia edo pertsona zein den berehala identifikatuko dute. Dena kontrolatuko dute: zer jaten duzun, zer edaten, zure etxean inork pardelik ibiltzen duen...». Intimitate galera nabarmendu nahi izan du Chicak, eta baita multak ere. «Hori guztia ondo egiten ez duenak multak izango ditu, 6.000, 15.000 eta 30.000 euro bitartekoak, eta gainera, beste isun bat ere izango da, bere bizilagunak salatzen ez dituenarentzat».
«Inspektorearen eta multa horien balioa zalantzan jartzen dut»
Chicak zalantza azaldu du auzi honetan: «Eusko Jaurlaritzak Udalera informe bat bidali du, esaten duena, multak txikiagoak izan behar dutela, eta inspektore horrek ez daukala eman nahi zaion autoritaterik. Nik ere hala uste dut».