Olinpiadak hasteko eguna gerturatzen ari da eta pixkanaka-pixkanaka, suziria ere bai, bidean topatzen dituen oztopo guztiei aurre eginda. Somaliako Piraten eskuetatik alde egitea ere lortu dute lasterkariek Gazte Asanbladak jakinarazi duenez.
Hona hemen Kronikara bidali duten azken komunikatuak dioena: «Suziri Olinpikoak zer ibilerak izan dituen Somaliako piratekin, Hernanira ailegatzen denean ezagutuko dugu. Oraingoz, epaileak kasua ikertzen ari dira, erreskatea nork eta nola pagatu duen.
Gorabehera horiek baztertuta, irudian ikusten denez, Suziri Olinpikoa Euskal Herrira iritsi zen atzo. Madrilgo Soto del Real kartzelatik igaro eta buila batzuk bota ostean, ´Biba Olinpiadak!`, deiadar egin dute batzuen batzuek barrutik, ez jakin nork, kartzeleroek ez baitiote Suziriari baimenik eman barrura sartzeko. Aitzakia jarri dute Piiiiii! egiten zuen Suziriaren giderrak. Etapa gogorra izan da haren ostekoa, Burgostik pasa orduko militarrak hasi baitira Suziriaren peskizan. Zorionez, Ebroko urak igarotzea lortuta, Euskal Herrira sartu da Suziri Olinpikoa, eta militarrek Ebroko krokodiloen hortzei begira gelditu behar izan dute».