GIPUZKOAKO herriarteko txapelketan talde gogorra aurkeztuko du Hernanik aurten ere. Gogorra eta orekatua, hiru mailatan baitituzte bikote onak hernaniarrek: kadete, jubenil eta seniorretan. Hala ere beste 22 herri izango dira lehian, eta horietatik 4-5 oso maila onekoak. Bihar aurkeztuko dute txapelketa 19:00etan, Miramonen (Donostia), Zientziaren Kutxagunean. Aurkezpena egingo dute Patxi Jauregi Gipuzkoako Euskal Pilota Federazioko lehendakariak, eta Iñaki Almandoz Kutxako Kudeaketa Komertzial Sozialeko buruak.
Hernaniarrak taldeburu
Sorteoan Hernani taldeburu izango da, iazko txapeldunordea delako. Horrek esan nahi du beranduago sartuko dela txapelketan, eta denek ere faboritoen artean daukatela. Ez da gutxiagorako; azken 10 urteetan 6 aldiz izan dira finalean, eta 3 aldiz jantzi dute txapela. Aurten ere 13 pelotari fin prestatuak daude, txapelketarik onena egiteko.
Faborito nabarmenik ez
Urtean-urtean, herri gehiago ari dira lehiatzeko herriarteko txapelketan, eta edozein taldek eman lezake ezustekoa. Esaterako, beti-betikoak hor izango dira: Azpeitia txapelerako faborito nagusia da, eta Azkoitia eta Donostia ere ez dira urruti ibiliko. Iazko txapelduna ezin ahaztuko dugu, Bergara. Eta hain ohizkoak ez diren bi talde ere nahiko indartsu ikusten dira aldez aurretik: Ataun, eta Alegia (Gipuzkoako kadeterik onena Alegikoa da, adibidez).
Dena dela, ezin da gauza haundirik aurreratu txapelketa hasi arte. Orain hasi eta ekainera arte luzatuko da lehia, eta ikusiko da zeinek eusten dion ondoen bere lekuari.