Buruntzaldeko Udalek iaz abiatutako kanpainari eutsi, eta hizkuntza-kudeaketari buruzko hitzaldiak antolatu dituzte eskualdeko Lanbide Heziketako ikasleei zuzenduta. Lan munduan euskera bultzatzeko eta orokorrean, euskeraren erabilera normalizatzeko Udalek elkarlanean egindako beste egitasmoetako bat da.
«Aurtengoan, eredu guztietako ikasleei eskaini zaie saioa; izan ere, hizkuntza-kudeaketak denoi eragiten digu, ez soilik hizkuntza bat edo beste dakitenei», azaldu dute Buruntzaldeko Euskara Batzordetik.
Hitzaldien helburuari dagokionez, adierazi dute hizkuntzen garrantziari buruz hausnartzea dela helburua eta baita ere, ikustaraztea hizkuntzak ikasi eta erabiltzeak nolako onurak ekartzen dizkion norberari eta enpresari. Horretarako, gizartean oso errotuta dauden hainbat ideia jarri dituzte kolokan, hala nola: hizkuntza bakarra jakinda hobeto moldatuko ginake; hizkuntza batzuk beste batzuk baino garrantzitsuagoak dira; estatu bati hizkuntza bakarra dagokio; eta hizkuntza ahulak eta indartsuak daude.
Hitzaldia entzun ondoren, heziketa zikloetako ikasleek galdetegia betetzen dute eta orainarte emandako erantzunen arabera, %93ak uste du hizkuntza-kudeaketa neurri batean baliagarria zaiola enpresari, eta etorkizunean euskeraz lan egin nahiko luketen galdetuta, hiru ikasletik bik neurri bateko adostasuna azaldu dute (%65).