Atez Ateko hondakin bilketa, Zero Zaborrerako bidean jardunaldien barruan, Kataluniako eta Italiako bina adituk beren esperientzien berri eman zuten Hernanin, larunbatean. Kataluniatik Josep Maria Tost eta Assunta Boba Caballé etorri ziren eta Italiatik Roberto Cavallo eta Rossano Ercolini. «Atez Atekoa sistemarik onena da hondakinen arazoari erantzuteko, datuek begibistan uzten dute: %65-85 artean berreskuratzen da eta zenbait herritan gehiago ere bai». Argi azaldu zuen Tostek, Associació de Municipis Catalans per á la Recollida Porta a Porta elkarteko lehendakariak eta CiU alderditik Riudecanyes-ko alkatea denak eta Diputatua ere izanak. Dauden topikoak ere gezurrak zirela azaldu zuen eta, besteak beste, ez dela herri txikientzako soilik. «Katalunian ia 100 herritan dago Atez Atekoa, ia 400.000 biztanlek egiten dute». Katalunian orain dela 10 urtetik dago martxan. Italian oinarritu ziren, eta han, 8 milioi pertsonek egiten dute egun Atez Ateko estriktoa; hau da, Hernanin jarri nahi dena. Mixtoa, nolabait esateko, 6 milioi gehiagok.
«Ez da ideologia kontua»
Bi herrialdeetako adituek argi utzi zuten Atez Atekoa ez dela ideologia kontua eta onartezina dela politikoki honekin jokatzea. Arrakasta hor dagoela azaldu zuten: «hasieran aurkariak izan arren, orain alderdi guztiek egin duten apustua da eta herritarrak harro daude Atez Atekoa egiten dutelako».
Ahalik eta zaborrik gutxiena sortzea helburu
Helburua birziklatzeaz gain, ahalik eta zaborrik gutxiena sortzea dela azaldu zuten. Eta Atez Atekoarekin hori gertatzen dela. «Ohiturak aldatu egiten dira eta beste modu batera erosten hasten da. Jendea kontzientziatu eta berrerabili daitekeen materiala erabiltzen hasten da».
Europatik datorren ekotasen direktiba ere izan zuten ahotan. Hondakinak behar bezala bereizten ez dituztenak penalizatu egiten ditu eta behar bezala bereizten dituztenak saritu. Tasa horiek ezartzea garrantzitsua dela azaldu zuten.
Tosten hitzaldiaren bideoa zerozabor.ning.com helbidean ikusi daiteke eta jardunaldiei buruzko informazio gehiago ere bai.