Hernaniko gaztetxoentzako ekitaldi ugari antolatu ditu Gazte Txokoak apirilean. Jakinarazi dutenez, hilabeteko aurreneko bost egunetan itxita izango da Aste Santua dela eta. Ondoren, oporretatik bueltan, antolatu dituzte, besteak beste, txapelketak, tailerrak eta irteerak.
Ikastaroa eta txapelketak bigarren astean
Aste Santuko oporren bueltan pegatinak egiteko aukera izango dute Gazte Txokora hurbiltzen diren gazteek. Apirilaren 7-8an izango dute irudimena praktikan jartzeko aukera.
Segidan, 9tik 11rako asteburuan, badminton eta ping-pong txapelketak izango dira. Eta horrez gain, herrian zehar izango den altxor bilketan ere parte hartzeko aukera izango dute herriko gaztetxoek.
Beste hainbat ekintza
hilabete osoan zehar
Aipatutakoaz gain, hilabetean zehar ere izango dira beste hainbat ekintza. Eskulanei dagokienez, margotzeko tailerra antolatu dute apirilaren 14an eta 15ean, eta argazki albuma egiteko tailerra apirilaren 21, 22, 28 eta 29an.
Gazte Txokoko arduradunek jakinarazitakoaren arabera, ikasturte honetan arrakasta haundia ari dira izaten antolatuko eskulan eta tailerrak.
Azkenik, eta irteerei dagokienez, apirilaren 17an hondartzara joango dira futbolean jolastera. Eta hilaren 24an mini golfean ibiliko dira, beraz, gazteek duten punteria erakusteko aukera izango dute.