Auzo udal bihurtzearen inguruan bere iritzia emateko aukera izango dute gaur Ereñotzuko biztanleek. Galdera bakarra izango dute erreferendumean: Ereñotzuko auzo udala sortzearen alde zaude? Galdeketa ez da loteslea izango baina pisu haundia izan dezake Gipuzkoako Diputazioak hartu behar duen azken erabakian. Galdeketa hau, orain dela bost urte hasitako prozesuaren fruitua da. Olak auzo elkarteak hartu zuen orduan prozesu honi forma emateko ardura eta Hernaniko Udalak auzo udalaren prozedura aho batez onartu ondoren galdeketa antolatu ahal izan dute. Galdeketaren emaitzarekin Diputaziora bidaliko duten txostena osatuko dute eta hauek erabakiko dute azkenean Ereñotzuri auzo udal statusa eman ala ez.
Bozkatzeko lekua: Ereñotzuko Kultur Etxea
Lastaola, Epele, Fagollaga, Ereñotzu, Latxe, Ugaldetxo eta Pagoagak osatuko dute Ereñotzuko auzo udala eta bertako biztanleak dira gaur bozkatzera deituak daudenak. Bozkatu behar dutenek bi baldintza bete beharko dituzte. Batetik, 2010eko martxoaren 1a baino lehen Ereñotzun erroldatua egotea, eta bestetik 16 urte beteak izatea.
Bi baldintza horiek betetzen dituztenak goizeko 10:00etatik arratsaldeko 18:00etara bere botoa emateko aukera izango dute Ereñotzuko kultur etxean. Bozkatzeko paperak bertan egongo dira eta arratsaldean bertan jakingo da zein izan den galdeketaren emaitza.
Ereñotzuko Olak auzo elkartearen iritziz galdeketa honek garrantzia haundia izango du. Alde batetik, Gipuzkoako Foru Aldundiaren azken erabakian izan dezakeen pisuagatik, eta bestetik, emaitza honek berretsiko lukeelako Ereñotzuko auzotarrek auzo udala sortzeko duten borondatea eta azken urteetan egindako lana.
Horregatik, Olak elkartetik parte hartzeko deia luzatu diete Ereñotzuko herritarrei eta hori sustatzeko hamaiketakoa eta merienda antolatu dituzte jendea bozkatzera joan dadin.
Diputazioaren
erantzunaren zain
Galdeketa pasa ondoren, ereñotzuarrek oraindik pixkatxo bat itxaron beharko dute Diputazioaren erantzuna ezagutzeko. Olak elkartearen esanetan ez diete zehaztu zenbat denboran hartu dezakeen Diputazioak auzo udalaren inguruko erabakia baina sei hilabeteko epea aurreikusten dute gutxi gora behera. Gipuzkoan lehenengo kasua izango da Ereñotzurena eta Diputazioan gai hau ondo aztertu nahian dabiltza etorkizunean iritsi daitezkeen beste eskaerei aurre egiteko.
Olak elkartearen iritziz, 2011ko udal hauteskundeetan auzo udala sortzea litzateke egokiena. Horrela, hauteskunde horietan Hernaniko Udaleko hauteskundeekin batera aukeratuko litzateke auzoko alkatea. Hauteskundeak baino lehenago auzo udala sortu beharko balitz, Diputazioak aukeratuko luke auzoko junta, aipatutako hauteskundeak iritsi bitartean.
Ereñotzu auzo udal bihurtuta ere Hernani izaten jarraituko luke, izan ere, prozesu honek zenbait eskumen jartzen dituelako bakarrik ereñotzuarren eskuetan. Eskumen horiei esker, Olak auzo elkartearen esanetan, ereñotzuko auzoaren biziberritzea lortuko litzateke eta bertako bizilagunentzako zerbitzu publikoak gerturatuko dira auzotik bertatik egindako zuzeneko kudeaketaren bitartez.
Beraz, nahiz eta gaurko galdeketa loteslea ez izan, egun garrantzitsua izango da gaurkoa ereñotzuarrentzat. Honen ondoren, Diputazioaren erantzunaren zain geratu beharko dute auzotarrak Ereñotzu auzo udal bihurtuta ikusteko.