«Udaberri epela, lainotsua eta euri gehiegi botako ez duena. Euri kantitate normala botako du». Joxe Ramon Apaolazaren hitzak dira, epe luzeko eguraldi iragarpenak egiteko gai den eguraldi gizon hernaniarrarenak. Negu nahiko arraroa izan da oraintxe bukatutakoa eta egindako iragarpen gehienak asmatu ondoren, Apaolazak udaberriko iragarpena egin du Kronikarentzat.
Aste Santu nahasia
Apirilaren hasieran eguraldi nahiko gora-beheratsua izango dugu. Indartsuegiak izango ez diren bi frente pasako dira apirilaren lehenengo 10 egunetan eta eguzkia eta euria tartekatuko dira Aste Santuko oporretan. Kanpora joateko aukera dutenek, berriz, eguraldi hobea aurkituko dute oporraldi honetan ziur aski. Apirilaren 10etik 15era, gutxi gora behera, eguraldiak okerrera egingo du nabarmen Apaolazaren esanetan. Ipar joera hartuko du haizeak eta borraska batek zeharkatuko ditu Kantauri Itsasotik Mediterraneora bitartean dauden lurraldeak. Honek, tenperaturak jaitsiarazi eta prezipitazioak ekarriko ditu. Zenbait lekutan elurra ere botako du Joxe Ramon Apaolazaren iragarpenaren arabera. Seguraski, 600-800 metrotik gora dauden eremuetan ikusiko dute berriro ere elurra.
Hilaren 15etik 18ra tregua txiki bat izango dugu baina 18tik aurrera euria gogoz botako du berriz ere. Haizearen norabidearen aldaketa bat-batekoa izango da eta kostaldean haizete haundiak izango dira.
Maiatza, hilabete euritsua
Maiatza hasieran eguraldi euritsua izango dugu, eta euri asko botako du gainera egun horietan. Maiatzaren erdialdetik aurrera, berriz, eguraldiak udako joera hartuko du: hego haizea eta tenperatura altuak. Maiatzaren 28tik aurrera ekaitz nahiko indartsuak ikusiko ditugu.
San Joan eguzkitsuak
Ekainean ere ekaitzak nagusituko dira hilabetearen hasieran eta bukaeran. Bereziki indartsuak izango dira 2tik 10era eta 27tik aurrerakoak. Ekain erdian, maiatzean bezala, eguraldi eguzkitsua nagusituko da. Joxe Ramon Apaolazaren iragarpenaren arabera, beraz, San Joanak eguraldi eguzkitsuarekin hasiko ditugu eta agian bukaera aldera euria ikusi dugu. Informazio gehiago http://jakindamet.blogspot.com blogean.