Bihar eguerdian ospatuko da Chillida Lekun aurtengo sagardo eguna. Aurtengoa bosgarren edizioa izango da eta urtero bezala ez dira faltako Hernaniko sagardoa eta Iratiko gazta. Txalapartariek, trikitilariek eta dantzariek girotuko dute jaia.
Eduardo Chillida-Pilar Belzunce fundazioak eta Hernaniko udalaren arteko hitzarmenari esker, hernaniarrek aukera izan dute aste honetan sarrerak erdi prezioan hartzeko. Gaur ere erosi ahal izango dituzte Biteri Kultur etxean, 4.25 euroko prezioan, eguerdiko 13:00k arte. Museoan egunean bertan erosiz gero, 8.5 euro ordaindu beharko dira. Sarreran banatuko dira eguneko oroigarri diren sagardo basoak 18 urtetik gora dituzten guztiei.
Chillida Leku museoak keinua egiten dio Hernaniko lehen jarduera ekonomikoari ekitaldi honen bidez, eta urtez urte jende gehiago animatzen da sagardoaren inguruko festa honetara. Sagardo eguna Eduardo Chillida–Pilar Belzunce Fundazioak Hernaniko Udalarekin duen Hitzarmeneko 2010eko kultura jardueren abiapuntua izango da.