Iritsi da Zuhaitz Eguna; natur-zaleentzat urteroko egun seinalatua. Aurten XXXVII. edizioa du Zuhaitz Egunak, eta Joxe Legarreta zenaren omenez egingo da, azken urteetan bezala. Aurten lizarrak, altzak eta haritzak landatuko dituzte, eta heldu nahiz haur, denak batera ariko dira.
Hernaniko Udalak, Mendiriz Mendik eta Aranzadik antolatu dute.
«Gogoa eta oinetako egokiak»
Zuhaitz Egunera joango direnek gogoa eta oinetako egokiak behar dituzte. Hori da Hernaniko Udalak bidali dien mezua. «Zuhaitzak zure zain egongo dira, eta eskatzen dizugun bakarra da, gogoa eta, oinetako egokiak. Goiz ederra pasako dugu».
Haurrak autobusean dijoaz Epelerrekara, goizeko 09:30etan abiatuta, Urbieta kaletik. Autobusak Irubiden utzi eta handik oinez joango dira Epelerrekara; gero Larre-Gainen hamaiketakoa egin eta Ereñotzun autobusa dute 13:00etan, bueltatzeko.
Helduak oinez joango dira, goizeko 08:00etan abiatuta, Gudarien plazatik. Epelerrekara bidea egingo dute, Karabel, Orkolaga baserria eta Goiko Añuatik barrena. Buelta autobusean, Ereñotzutik, 13:00ean.