udalak jakinarazi duenez, datorren asteartetik aurrera, martxoak 23, Hernaniko familia bakoitzak beraiei dagozkien bi kubo marroiak, hau da, gai organikoa biltzeko kuboak, hartzeko aukera izango du. Kuboengatik ez da ezer ordaindu beharko. Epea zabalik izango da apirilaren 17ra arte. Kuboekin batera, gida bat banatuko da hondakin bakoitza zein egunetan atera behar den azaltzen duena. Autokonposta egin behar ez duten hernaniar guztiek hartu behar dituzte kuboak, eta horretarako, Kardaberaz 25eko atez ateko bulegora jo beharko dute, lan egunetan, 10:00etatik 14:00etara eta 16:00etatik 20:00etara.
Auzoetan ere banaketa
Banaketa erraztearren, auzoetan ere egingo da banaketa. Kronikaren bidez, Udalak egunero jakinaraziko du kuboak zein auzotan banatuko diren. Auzoko bizilagunek bakarrik hartu ahal izango dute eta auzo batean bilketa egiten ari diren momentuan, auzo horretakoek ezingo dituzte kuboak bulegoan eskatu; aurretik eta ondoren bai.