Gazte eta helduek batera landatuko dituzte zuhaitzak datorren larunbatean, Zuhaitz Egunean

ZUHAITZ Eguna izango da datorren larunbatean Her­nanin, basoak biziberritzeko helburuarekin. Zuhaitz Egu­na Mendiriz Mendi elkarteak eta Hernaniko Udalak antolatzen dute elkarlanean, eta aurtengoak badu berezitasun bat: orain arte bi egunetan landatu badira ere, aurten, heldu zein gazteek batera landatuko dituzte zuhaixkak.

Izena emateko azken astea
Landatzen parte hartu nahi duten guztiek, izena eman behar dute aldez aurretik. Izen ematea ezberdina izango da haur eta helduentzat.
Neska-mutilek ikastetxeetan eman behar dute izena, eta azken eguna martxoaren 23an izango da, hau da, asteartean.
Helduek berriz, izena Mendiriz Mendi elkartean eman behar dute, eta azken eguna martxoaren 25ean izango da, osteguna. Mendiriz Mendi elkartea Iturregi  Plazan dago, ordutegia da 20:00etatik 21:00­e­tara, eta telefono zenbakia da 943 33 27 45.

Bi irteera ezberdin
Hiru zuhaitz mota landatuko dituzte aurtengoan, guztiak Epelerrekan: lizarra, haltza eta haritza. Landatzea leku berean egingo badute ere, helduak eta gazteak leku ezberdinetan egin dute hi­tzordua.
Gazteentzako hitzordua goizeko 09:30etan egin dute, Urbieta kalean, Biteri parean. Autobusez joango dira  Iru­bi­de jatetxe ingururaino. Ber­ta­tik abiatuko dira Epele­rrekara eta landaketa egingo dute. Ondoren, Larregain ba­serrira joango dira, handik Ere­ñotzura, eta hantxe egingo dute hamaiketakoa.
Helduei dagokienez, hi­tzordua goizeko 08:00etan egin dute Gudarien plazan. Hauek oinez egingo dute Epelerrekarainoko bidea. Gudarien plazatik Karabelera joango dira, pasako dituzte Orkolaga, Juanantonenea eta Goiko Añua baserriak, eta Epelerrekara iritsiko dira.
Zuhaixkak landatu ondoren, Epelerrreka eta Uso­koe­rreka inguruan aurkezpena eta azalpena egingo dute Aran­­zadiko ikerlariek. Ondoren hamaiketakoa egingo dute.