Zubietako zenbait herritarrek eskerrak eta animoak eman dizkiote Hernaniko herriari

Eraiki nahi den errauste plantak erdiz-erdi harrapa­tzen dituen Zubietako 11 herritar, tartean, Herna­nin jaiotakoak eta bertan familia eta lagunak dituztenak, Herna­nin izan ziren atzo. Gutun ireki bat idatzi dute eta gutun hori Herna­niko Udal agintariei eta hernaniar guztiei eskura entregatzera etorri ziren.
Bertan izan ziren Marian Beitialarrangoitia alkatea, Izaskun Txin­txurreta, Juan Karlos Plazaola eta Beatriz Fer­nan­dino zinegotziak. Gu­tu­na alkateari eman aurretik Luken Goia hernaniarrak bertan idatzitakoa irakurri zuen eta azaldu zuen eskerrak eta animoak ematen dizkiotela Herna­niko herriari, «Usurbi­lek eman­dako urra­tsa jarraituz, Atez Ateko bilketa sistema mar­txan jartzea erabakitzeagatik; erraus­keta bezalako sistema pozoi­tsurik gabe, askoz soluzio hobea martxan jartzeagatik».

«Denok gara kaltetuak: Hernani eta inguruko herriak»
Intzinerazioak eragingo li­tuz­keen kalteez kezkatuta, zubietarrek argi azpimarratu zuten: «De­nok gara kaltetuak: Hernani eta inguruko beste herrietako jende askok jasango ditu kalteak kilometro askoko bueltan». Beitia­larrangoitia alkateak  hitza hartu zuenean, ildo beretik jo zuen eta askotan kalte ekonomiko eta ekologikoak aipatzen badira ere, batez ere, osasunean eragingo duen kaltea izan behar dela kontuan azaldu zuen. Gaineratu zuen, Hernanik bere eskuetan dagoen guztia egingo duela erraustegirik egon ez dadin eta diputazioari eskatu zaion moratoriaren, hau da, epea luzatzearen aldeko jarrera azaldu zuen beste behin.  

Firma bilketarekin minduta
Erreferenduma eskatuz, Her­na­nin bildu diren milaka firmei dagokienez, honakoa azaldu zuten Zubietatik bertaratutakoek: «Esan nahi du­gu minduta gaudela. Jakinda zer nolako dirutza eta interesak dauden errauste plantaren atzean, jakinda zer nolako intoxikazio kanpaina egin duten batzuek Atez Atekoa­ren kontra, jakinda nolako haserrea piztu zen Hernanin intzineradora Landarbason jartzea aipatu zutenean, ja­kinda hori guztia eta gehiago... ezin dugu ulertu firma bilketa hori. Atez Atekoa oztopatzeak edo atzeratzeak ez baitu lortzen, Zubietan intzineradora eraiki nahi dutenen interesei eta indarrei laguntzea besterik».

Konfidantza
hernaniarrengan
Azaldu zuten Hernaniko he­rria ezagutzen dutela eta kon­fidantza dutela hernaniarrengan. «Zubietan hamaika gautan galdu dugu loa muns­­tro horregatik. Baina gaurik ilunenean ere eduki dugu lagunen eta kontzien­tzia duten herritar askoren babesa». Eta eskaera argia egin dute: «eman aukera Atez Atekoari! Erraustegirik ez, ez Zubietan, ez beste inon!».