Emakumearen Nazioarteko Eguna martxoaren 8a da. Aurten ospakizun berezia da, 100 urte betetzen direlako, emakumeen eskubideen aldeko eguna aldarrikatu zutenetik; Kopenhagen egin zuen, Clara Zetkin komunista alemaniarrak. Aurten, urteurren hori gogoratu nahi da, inoiz baino ozenago.
Ekitaldi guztien artean, ohiartzunik haundiena izango duena da Emakumeen Mundu Martxa. Hirugarren aldia da Emakumeen Mundu Martxa egiten dela, azkena orain dela 5 urte, eta aurten munduko 51 herrialdetan egingo dira martxak. Euskal Herrian Iruñeatik abiatu zen astehelenean, eta hiriburu nagusienetan pasata, berriz Iruñeara bueltatuko da, martxoaren 13an. Azpimarratzen diren puntu nagusiak lau dira: emakumeen aurkako indarkeria, sexu eta ugalketa eskubideak, prekarietatea, eta burujabetza elikaduran.
Mundu mailako ekitaldi bat ere izango da aurten: urrian, Kongon, Sud Kiwu hirian. Munduko 51 herrialdetako ordezkaritza izango da han. Euskal Herritik, Ibiltaria izeneneko emakumea izango da; irudi bat, herriz herri egindako muralekin osatuko dutena.
Kalejira atzo Hernanin
Mundu Martxaren inguruan Hernanin Kalejira egin zuten atzo. Mundu Martxak eskatzen dituen puntu berak eskatu zituzten atzo Hernaniko kaleetan. Bide batez, deialdia egin zieten Hernaniarrei, martxoaren 11n Donostiara joateko, Iruñeatik datorren martxari harrera beroa egitera.
‘Emakumearen egoera Indian’ erakusketa Biterin
Erakusketa jarria dago Biterin, Emakumearen egoera Indian. Zein dira aldaketarako aukerak. Diskriminazio klase guztiak desagertzeko bideen bila. Titulu hori du erakusketak, argazki eta testuz osatutako erakusketak, eta astelehenetik ikusgai dago Biterin, martxoaren 23ra bitartean.
Erakusketa jarri duena Calcuta Ondoan ONGa da, eta honakoa dio: «India oso aberatsa da kultura, ohitura eta baloreetan. Azken urteetan ekonomia asko ari da indartzen. Dena dela, arazo nagusietako bat generoen arteko desoreka da; emakumearen egoera penagarria».