Galdeketa Ereñotzuko Auzo Udala sortzeko, hilabeteko azken igandean

Ereñotzun Auzo Udala (Tokiko Entitate deszentralizatua) sortzeko prozesua azken fasean sartu da; urtarrilean Udal Plenoan  onartu ondoren, orain galdeketa egingo dute Ereñotzuko biztanleen artean. Izan ere, horrelako entitate bat sortu ahal izateko, auzoko hautesleen iritzia  eskatzen da (iri­tzi ez binkulantea), Plenoan onar­tua izateaz gain. Iritzia galdeketaren bidez jasoko da eta   lortutako emaitza Gi­puz­­koako Foru Aldundian aurkeztuko da dagokion txostenarekin batera. Aldundiak du azken hitza. Galdeketa hori mar­txoaren 28an, hilabeteko azken igandean izango da.

«Pausu oso garrantzitsua»
Ereñotzuko Olak auzo elkartearentzat, pausu hau oso garrantzitsua da. «Alde batetik, Gipuzkoako Foru Aldun­diaren azken erabakian izan dezakeen pisuagatik, eta bestetik, emaitza honek berretsiko lukeelako Ereñotzuko auzo­tarrek Auzo Udala sor­tzeko duten borondatea eta azken urteetan egindako lana».
Hori horrela, auzotar guztiei dei egiten die martxoaren 28an egingo den galdeketan beren botoa emateko. Horrez gain, jakinarazi du datozen egunetan etxez etxe ibiliko direla Auzo Udalaren informazioa ahalik eta auzotar gehienei emateko eta izan di­tzaketen zalantzak argitzeko.

Auzoa biziberritzea eta
zerbitzu publikoak
gerturatzea helburu
Duela bost urte Hernaniko Udalak eta Ereñotzuko Olak Auzo Elkarteak elkarlanean abiatutako prozesua  da Auzo Udalarena, eta behin azken fasean sartuta, asmoa dute 2011ko Udal hauteskundeetarako Auzo Udala sortzea.
Auzo Udala sortzearen arrazoia honakoa da Olaken arabera: «Ereñotzuko Auzo Udalaren helburu nagusiak, Ereñotzuko auzoaren biziberritzea eta bertako bizilagunei zerbitzu publikoa gerturatzea dira. Horretarako tresna izan behar du Auzo Udalak; auzotik bertatik egindako zuzeneko kudeaketaren bitartez».

Galdeketa

Galdera bakarra:
Ereñotzuko Auzo Udala
sortzearen alde al zaude? Bai/Ez.
Noiz eta non izango da
galdeketa:
Martxoaren 28an, igandea, Ereñotzuko Kultur etxean.
Ordutegia:
10:00etatik 18:00etara.
Baldintzak:
- 2010eko martxoaren 1a baino lehen, Ereñotzun
erroldatua egotea (Hernaniko Udaletik bidaliko dira errolda txartelak).
- 2010eko martxoaren 28an, 16 urte beteak izatea.