HERNANIKO Kronika 2000 urteko ekainean sortu zen, San Joan bete-betean, eta aurten egingo ditu 10 urte hernaniarren artean. Hori ospatzeko, eta proiektu honetan parte hartu duten guztiei esker onez, Hernaniko Kronikak festa urtea du 2010eko hau. Festa urtea, ospakizun urtea, eta aurrera begira oinarriak sendotzeko urtea. Lehendabiziko ekitaldia Larre-Gain sagardotegian izango da, datorren ostiralean. Bertan izango da, batetik, Esne Beltza talde ereñotzuarra; eta bestetik, bertsolariak: Unai Agirre, Xabier Legarreta eta Iñaki Zelaia. Ilunabarreko 20:00etan hasiko da jaia, eta bertan izan nahi duenak, sarrerak salgai ditu, 35 euroan: Aralar tabernan, Oindi tabernan, Larre-Gain sagardotegian, eta Hernaniko Kronikan bertan (Larramendi, 11).
Bertsoa, musika eta festa
Lehendabiziko ekitaldian bertsoak eta musikak izango dute protagonismoa. Hernaniko bertso eskolako hiru kide, Hernaniko Kronika ondo ezagutzen duten hiru lagun, eta puntako hiru bertsolari izango dira Larre-Gaineko afaria girotzen: Unai Agirre eta Iñaki Zelaia hernaniarrak, eta Xabier Legarreta aranoarra. Festaren bigarren zatia musikak jantziko du. Ereñotzuko Esne Beltza talde famatua izango da Larre-Gainen, bere azken diskoarekin, Esne Zopak diskoarekin, alegia.
Hamargarren urteurrena, esker oneko urtea
Dobera Euskara Elkarteak sortu zuen Hernaniko Kronika, eta horretan lanean aritu zirenei eta egunkaria ateratzea posible egin duten guztiei eskerrak eman nahi dizkie elkarteak aurten. Kronika sortzen aritu zirenak, bertan lanean aritu diren langileak, egunero beren albisteekin Kronika aberastu duten herritar eta taldeak, eta nola ez, irakurle guztiak eskertu nahi ditu. Hernaniko informazioa egunero denda eta kioskoetan egotea, euskeraz, eta doan... posible egin duten denei eskerrak emateko urtea.
Orain arteko ibilbidea azalduko duen urtea ere izan nahi du aurtengoak; kazetaritza, eta herri kazetaritza zein egoeratan dagoen aztertzeko urtea ere bai; eta aurrera begira pausuak nondik eman aztertzeko urtea.
Logo lehiaketa, hitzaldia, Bazkide Kanpaina
Ekaina bitartean, hamaika ekitaldi antolatu dira. Hitzaldia izango da apirilean, kazetaritzaren oraingo egoerari buruzkoa, kazetaritzaren joera berriak aztertzeko hitzaldia, herri komunikabideen erronkak aztertzeko.
Lehiaketak antolatuko dira, apirilean hasita. Nagusia, logo lehiaketa izango da. Ekainetik aurrera, Hernaniko Kronikak itxura aldaketa egingo du, eta logotipo berria aukeratzeko herritarren proposamenik ederrena aukeratuko da.
Bazkide kopurua haunditu nahi du aurten Dobera Euskara Elkarteak, aurrera begira eman beharreko pausuak eman ahal izateko, babes haundiagoa lortu beharra baitauka herritarren artean. Oraindik orain, 450 bazkide ditu Dobera Euskara Elkarteak, eta bazkide kopuru hori 1.000 lagun ingurura igo nahi luke. Bazkideek 35 euro ordaintzen dituzte urtean, eta horrekin laguntzen dituzte Dobera Euskara Elkarteko egitasmoak; tartean, Kronika.
Horrez gain, egingo dira baita ere, aldizkari berezi bat, merkatu ikerketa, eta ekitaldi nagusi bat, ekaina inguruan.
Aurrera begira, informazio gehiago eta zabalagoa
Erronka berri asko ditu Hernaniko Kronikak aurrera begira. Teknologia berrietan gehiago sakondu nahi du Kronikak, web orrialdea indartuta, herritarrei blog aukera zabalduta, iritzia emateko aukerak emanda. Eta esparru batzuetan gehiago arakatu nahi du: lan mundua, gizarte mugimenduak, eta abar.
Hernaniko Kronika da Euskal Herriko herri-egunkari bakarra, eta bere izaerari eutsi nahi dio datozen urteetan ere; hernaniarren laguntzarekin eta babesarekin.