Euskal Autonomia Erkidegoko ikastetxe publikoetan egingo duten bezalaxe, Hernaniko ikastetxeetako jangeletako langileek greba mugagabeari ekingo diote asteartetik aurrera. Astean bi egunez izango da greba, «langileen eta gure seme-alaben eskubideengatik». Hala azaldu dute: «enpresek diotenez, izugarrizko soldata igoera lortzearren dihardugu, baina hori guztiz okerra da. Gure aldarrikapen nagusiak seme-alabek erabiltzen duten zerbitzua hobetzeko helburuarekin egin dira».
Lau eskaera
Honakoa eskatu dute: «txostenak lantzeko, tutoreekin hitz egiteko... lanaldia luzatzea, etengabeko prestakuntza izatea, ratioak jaitsiz atentzioa hobetzea eta Saileko sukaldeko langileekin parekatzea».
Sortu daitezkeen eragozpenen jakitun, elkartasuna eskatu dute «irtenbidera lehenago iristeko». Eta ardura langileei leporatu beharrean, benetako arduradunei leporatzeko eskatu dute: «enpresei eta Eusko Jaurlaritzari».