hernaniarrak ez dira nolanahiko urtea egiten ari aurtengoa. Lau final jokatuko dituzte asteburuan, hiru Euskal Herriko txapelketan, eta bat Gipuzkoakoan. Ojuel eta Gorrotxategi, Goikoetxea eta Gutierrez, eta Pagola eta Semper dira finala jokatuko dutenak Euskal Herrikoan. Gipuzkoako finala jokatuko dutenak, trinketean, Otaegi eta Esnaola. Baten faltan lau final beraz, hernaniarrek jokatuko dituztenak; eta bost izan zitezkeen, Santxok eta Aizpitartek aurreko asteburuan galdu izan ez balute (txapelketa dotorea egin dute bi horiek ere).
Ojuel eta Gorrotxategi atzo
Paul Ojuelek eta Aitor Gorrotxategik eskuz binaka jokatu zuten atzo, Mendizabal eta Irureta bikote elgetarraren kontra. (Kronikak erredakzioa itxi zuenean bukatu gabe zen partidua). Finala, atzo jokatu zuten, 20:00etan, Zornotzan, eta gaur aukera izango da ETB1en ikusteko.
Txapelketa gogorra jokatu behar izan dute hernaniarrek, eta final erdia, are gogorragoa. Final erdia 22-21 irabazi zuten, 17-21 atzetik joan eta gero, Ollo eta Etxeberriaren kontra. Horrela, hernaniarrek ordaina hartu zieten nafarrei, sailkapen fasean galdu egin baitzuten beren kontra.
Bihar bi final
Paleta gomaz, bihar bi final jokatuko dituzte hernaniarrek. Nagusietan, bigarren mailan, Miren Goikoetxea eta Eli Gutierrez finalean izango dira, joan den asteburuan Goenaga eta Lukasi (Hernani) irabazi eta gero. Txapelketan partidurik galdu gabe daude bi hernaniar gazteak; maila oso ona erakusten ari dira, eta badirudi, partidu garrantzitsuetan ez direla kokiltzen. Mariñelarena eta Urtasun iruiñarren kontra jokatuko dute, Labriten, 10:30etatik aurrera.
Jubeniletan ere hernaniarrak izango dira finalean, paleta gomaz. Eli Pagola eta Maider Semper dira hain urruti iritsi direnak. Klasifikazio partiduetan partidu guztiak irabazi dituzte, eta oso indartsu iritsi dira finalera. Aurrean beste bikote haundi bat izango dute: Mentxakatorre eta Gonzalez. Finala, Labriten, 10:30etatik aurrera.
Trinketean ere punta-puntan
Aritz Otaegik eta Eñaut Esnaolak gaur jokatuko dute, Gipuzkoako finala, Irurako trinketean, 15:00etatik aurrera, laugarren partidua. Aritz Otaegi aurrelariak jokatuko du finala, nahiz eta azken partidua Iñaki Esnalek jokatu, berak ezin zuelako. Behar Zana taldeko bikotearen kontra dute, Goikoetxea eta Esnaolaren kontra.
Paleta gomaz, Hernaniko 12 pelotari ariko dira GRAVN txapelketan, Gipuzkoaren izenean. Datorren hasiko da txapelketa, eta Hernaniko Pelota Elkarteko arduradunak txoratzen daude, maila guztietan badelako hernaniarren bat, gutxienez. Federatuta dauden 16 pelotarietatik 12 selekzionatu dituzte. Garbiñe Tijerok dioenez, «Hernanin orain ari gara ikusten urtetan egindako lana. Ondo egindako lana. Eta emaitzak bikainak dira. Maila guztietan (batez ere gazteenetan) izugarrizko maila dago Hernanin». 12 hauek dira Gipuzkoaren izenean ariko diren hernaniarrak: Aierbe, Irazustabarrena, Semper, Goikoetxea, Ugalde, Perez, Pagola, Manzisidor, Lizeaga, Jauregi, Lucas eta Zabala.