Euskal Preso Politikoen Kolektiboaren historia biltzen duen liburua aurkeztuko dute bihar, 11:00etan Biterin: Burdinen arteko herria. Elkarlanean egina da, espetxetik eta kanpotik lortutako informazioarekin osatua. Argazkiak ere badira. Eta guztia antolatzeko ardura Joxean Agirre donostiarrak izan du. Liburua nondik eta zein helbururekin sortu den azaldu dio Kronikari. «Aspaldiko ideia eta egitasmoa da. Ni oraindik kartzelan nengoela gogoan genuen proiektua, alegia. Helburua da EPPKren errealitatea ezagutarazi eta urte luzetan ehunka preso iraunkorki kartzelan egoteak politikoki esan nahi duena jendarteratzea. Jende askok (gehiegi) hitz egiten du euskal preso politikoen egoeraz eta pentsamenduaz, eta toxikazio etengabe horri txertoa jartzeko modurik eraginkorrena nork bere hitza hartu eta zabaltzea da. Horretan dago Kolektiboa».
«Asko eman duen eta eman nahi duen taldea»
Burdinen atzean dagoen errealitatera hurbiltzeko balio du liburuak: «Estereotipoak eta estigmak bolo-bolo erabili dira errealitate, kolektibo hori deskribatzeko, eta gertutasuna eman nahi izan diogu jendearen perspektibari. Mitoak alde batera utzi, eta militante presoen atzean dagoen aberastasuna eta alde sakon eta humanoa zabaltzeko. Asko eman duen eta eman nahi duen jende-taldea baita EPPK». Bertan irakurleak aurkituko duenaz galdetuta honakoa erantzun du Agirrek: «Denetarik, baina batik bat gertaera politiko, fase errepresibo eta bizipen pertsonal-kolektiboen arteko lotura jarri nahi izan dugu begien bistan». Lan honetan jende askok egin dituela ekarpenak azaldu du; besteak beste, Jon Anzak.
«Ezinbestekoa Hernanin
aurkeztea»
Joan den ekainean eman zuten argitara liburua eta Durangoko Azokatik, aurkezpenak egiten ari dira herrietan. Hernanin, bihar izango da Biterin. Agirrek esan bezala, «herri honetan ezinbestekoa zen liburuaren aurkezpena; ez bakarrik hemengo presoen zerrenda oso haundia delako. Hernanin, betidanik, presoekiko elkartasun uholde ezin altuagoa altxatu delako baizik». Liburua bertan erosteko aukera izango da.