Chillida Leku museoak 2000 urtean zabaldu zituen ateak eta aurten 10garren urteurrena ospatzeko ekitaldiak izango dira. Ostegunean izan zen lehenengoa. Zabalaga, poesia eta eraikuntza izeneko argazki erakusketa aurkeztu zuten ehun bat pertsonen aurrean.
Erakusketan azaltzen diren argazkiek biltzen dute Zabalaga baserriaren berritze prozesua. Giuliano Mezzacasak (Italia, 1938) ateratako argazkiak dira, eta irudi horietan biltzea lortu du eraikinak daukan izaera, eta barruko poesia. Mezzacasak gogoan izan zuen Eduardo Chillida, eta eskerrak eman zizkion baserria berritzeagatik eta argazkiak egiteko aukera emateagatik. «Izugarri gozatu nuen. Espero dut argazkiak zuen interesekoak izatea eta gutxienez, nik gozatu nuenaren erdia gozatzea», azaldu zuen ekitaldian.
Iagoba Fanloren kontzertua eta koktela
Erakusketa zabaldu aurretik, kontzertua eman zuen Iagoba Fanlo biolontxelo-joleak. Berak azaldu bezala, Chillidaren konpositore gustokoenaren, hau da, Bach-en obra jo zuen. Bere Sei Suite-tatik lehenengoa, hain zuzen ere.
Kontzertu ostean, argazki erakusketa ikusteko aukera izateaz gain, mokadutxo bat jan eta ardo beltz ederra probatzeko aukera izan zen, Ysios-en eskutik.