Amnistiaren Aldeko Mugimenduak salatu du, Jose Camacho hernaniarrak ospitalean jarraitzen duela, joan den otsailaren 17tik. Camacho otsailaren 15ean atxilotu zuen Guardia Zibilak. AAMk prentsa oharrean salatu du, Camacho ez dagoela ospitalean lehendik zituen osasun arazoengatik, baizik eta torturatu egin zutelako eta ariketa fisiko latzak eginarazi zizkiotelako, inkomunikatuta eduki zuten bitartean. «Guardia Zibilak torturapean, behartuta eginarazi zizkion ariketa fisikoek eraginda dago ospitalean, eta horren eraginak ez ditu oraindik gainditu eta ez diote medikuaren partea eman».
«Poltsa, askotan egin zioten, arnasik gabe uzteraino»
AAMk gogorarazi du, Camachok torturak salatu zituela. «Mehatxu ugari jaso zituen, kolpeak ere bai. Presioak, irainak. Poltsa askotan egin zioten, arnasik gabe uzteraino. Poltsa jarria zuela ariketa fisikoak eginarazi zizkioten. Horren ondorioz, eskubiko hankako atzeko muskulua erabat txikitua dauka. Ariketen ondorioz, zelulak hil zitzaizkion, eta hildako zelulak odolean sartu. Odola infektatua du eta hori gainditu arte ez dute ospitaletik aterako».