Maiatzaren 9rako, hau da, Atez Ateko hondakin bilketa sistema martxan jartzen denerako, guztia prest izateko, Udala ari da zenbait erabaki hartzen. Esaterako, joan den asteartean egin zen Plenoan, Hondakinen Ordenantza berria onartu zen, eta hala, zehaztuta geratu dira Atez Ateko sistemaren arauak zein diren, eta herritarrek zein betebehar izango dituzten; eta arau horiek edo betebehar horiek bete ezean, isunak zenbatekoak izango diren. Arau-hausteak hiru motatakoak izango dira: oso larriak, larriak eta arinak. Mota bakoitzaren arabera, isunak izan daitezke 60 eurotik hasita, 30.050 euro bitartekoak. Ezker Batuak eta Gobernu Taldeak alde eta gainerakoek kontra bozkatuta onartu zen Ordenantza berria.
Zaborrak biltzeko enpresa publikoa sortzea
Udalak, hondakinei dagokienez, beste erabaki bat ere badarabilki eskuartean; hondakinak biltzeko eta kudeatzeko enpresa publikoa sortzea, hain zuzen ere. Erabaki horri, lehendabiziko onarpena eman zitzaion astearteko plenoan, Gobernu Taldeak eta Ezker Batuak alde bozkatuta eta gainerako alderdiek kontra.
Enpresa publiko hori sortzeak esan nahi du, Udalak beregain hartuko lukeela hondakinak biltzeko eta tratatzeko eskumena. Orain arte eskumen hori San Markoseko Mankomunitateari delegatu izan zaio eta bertako enpresa ezberdinak arduratu dira zabor bilketaz eta gestioaz. Orain, Hernanik bere hondakinak zuzenean kudeatuko lituzke enpresa publiko horren bidez. Enpresa hori Oiartzun eta Usurbilekin sortuko litzateke eta bakoitzak bere partea izango luke. Hernanik %49 izango luke.
Dena dela, San Markosen esku jarraituko lukete honako hiri-hondakinen bilketa, kudeaketa eta tratamenduek: beira, oihala, etxeko hondakin arriskutsuak, pilak, egurra eta etxetresna elelktriko guztiak. Eta baita errefusaren (azken kondarren) tratamenduak ere. Horrez gain, tamaina haundiko tratamendua Garbiguneen bidez egingo litzateke.
Aipaturiko egitasmoa jendaurrean ikusgai dago eta partikular eta entitateek aukera dute nahi dituzten oharrak egiteko.