Greenpeace: «Atez Ateko sistema Gipuzkoa osoan jartzea eskatu nahi dugu»

Juantxo Lopez de Uralde Green­peaceko Espainiako burua izan zen atzo Usurbilen, eta babes osoa azaldu zien Atez Atekoari, eta Usurbilen eta Hernanin egiten ari diren esperientziei. Ricardo Ortega, San Mar­kos Mankomuni­tateko Presiden­tea ere bertan izan zen, eta Usurbil eta Hernaniko Alkateak ere bai. Usurbilen Atez Atekoari buruzko erreferenduma hurbiltzen ari da, eta bertako Udalak talde askoren babesa jaso du. Green­peace talde ekologistaren ba­be­sa jaso zuen atzo, eta Marian Beitia­larrangoitia Her­na­niko alkatea ere bertan izan zen, Greenpeace bezalako talde ekologista ospetsuak Atez Ateko sistemaren inguruan zer nolakoa iritzia zuen ezagutzeko. Usurbilen zaborrak nola jaso­tzen dituzten erakutsi zieten gonbidatuei eta komunikabideei. Uralde zaborren kudeaketa sistematan da aditua, eta bere esanetan, Usurbilgo Atez Ate­ko sistema berri­tzailea da, eta egokia. Bereziki, Usur­bilen lortu diren birziklatze datuak goraipatu zituen, (%82 birziklatzera iritsi direla azaldu zuten atzo). Sistema hori Hernani bezalako beste herri handiagoetan egiteko aukeraz galdetuta, gauzarik garran­tzi­tsuena borondatea dela esan zuen. Horrez gain, adierazi zuen, borondatea izanez gero, Gipuzkoa osora zabaldu litekeela Atez Atekoa. Marian Beitialarrangoitia Her­na­­niko Alkateak berriz ere azaldu zuen Hernaniko Udalak Atez Atekoaren alde egiten duela apustu. Bere esanetan, Greenpeacen bisitak erakusten du, Atez Ate­koaren eztabaida parametro politikoetatik kanpora eraman behar dela, eta ingurumenerako zer den ona eta zer den txarra dela eztabaidatu beharrekoa. Azkenik, Xabier Mikel Erre­kon­do Usurbilgo Alkateak adierazi zuen, Usurbilgo herriak erakutsi duela zaborraren arazoak baduela beste irtenbide posible bat. Uraldek bezala, Errekondok ere adierazi zuen, Atez Atekoa Gipuzkoa osora heda­tzeko moduko sistema dela.