Ggalarretak bere ateak itxi ditzake betirako martxoaren 31n. Remonte 2000, Galarretako erremonte jaialdiak antolatzeaz arduratzen den enpresak erremontistei jakinarazi die, pelotalekuko jarduera bertan behera utziko duela aipaturiko egun horretan. Eta gauza bera gertatuko da Uharteko Euskalekin. Juan Antonio Ercilla enpresako gerenteak azaldutakoaren arabera, arrazoi ekonomikoak daude erabakiaren atzean, azken urtean diru sarrerek behera egin baitute, apustuenak batez ere. Ercillak gaineratu du lehenago ere itxi zitekeela pelotalekua, baina luzatu egin dutela egun horretan bertan bukatzen zaizkielako kontratuak bertako pelotariei.
Konponbidea: bazkide edo enpresa berri bat
Horrez gain, enpresatik azaldu dute itxaropena egongo litzatekeela, erremonteak jarraitu dezan, interesa duen bazkide edo enpresa berri bat agertuko balitz norabide berriarekin. Honi lotuta, pelotariei jakinarazi diete enpresariren batek jarduera hartu dezakeela, baina ez dute ezer zehaztu. Ercilla ostegunean da azalpenak ematekoa prentsaurrean.