Ez dakizu zein sagardotegira joan? begiratu zeure mobilean

Sagardotegien inguruan behar den informazio ia guztia aurki daiteke Gipuzkoako Sagardogile Elkarteak  egokitu duen Txotx gida berrian: noiz ireki eta ixten dituzten ateak sagardotegi desberdinek, zein egunetan egiten duten lan eta jai, ematen dituzten zerbitzuak eta dauzkaten berezitasun eta salmenta moduak zein diren. Galduta ibil daitezkeen sagardozaleentzat mapa interaktibo bat ere badu gainera gida berri honek, sagardotegi bakoitza non kokatzen den garbi erakusten duena.
Elkartearen inguruko kontuez gain sagardoaren deskribapen motz bat ere topa daiteke telefono mugikorrerako gida berrian. Baita merkaturatzeko moduen informazioa eta kontserbaziorako eta garraiorako gomendio baliagarri batzuk ere. Sagardoak dituen ezaugarri fisiko-kimiko eta mikrobiologikoen azalpen bat ere badago.

Sagardoaren dekalogoa
Sagardoaren dekalogo bat ere eskein­tzen du gidak hamar arauetan. Arau hauek dira batzuk:
1. Sagardoa 10-13º C gradu artean kon­tsumitzea gomendatzen da, freskoa.
2. Sagardoa filtratu gabeko edaria denez, sedimentuak hondoratzen joango dira denborarekin. Ireki aurretik botila buruz behera jarri eta astindu egingo dugu, sagardoa homogeneizatzeko.
3. Edalontzitik 20-30 zentimetrora zerbitzatu, sagardoa hautsi eta txinparta ateratzeko.
4. Trago batean edango den sagardo kopurua zerbitzatu aldiro.
5.  Behin botila irekita denbora tarte laburrean kontsumitzea komeni da, irekita gordez gero, propietateak galduko baititu.
6. Sagardo bakoitzak dituen ezaugarrien arabera, kontsumitzeko garai egokiago bat du, normalean botilaratu eta urtebeteko epean.
7. Sagardoa edateko edalontzia zabala eta kristal finekoa izatea gomenda­tzen da.

Sagardoa osagai duten
plateren errezetak
Berritasunen artean, gidan aurkeztu dituzten errezetak daude. Guztiek berezitasun bera dute, sagardoa dutela osagaietako bat. Adibidez,  txerri-xolomoa sagardo saltsarekin nola prestatu erakusten dute:
Osagaiak: 8-12 txerri xolomo xerra, 1- 2  tipula,    baratzuria, ogi birrindua eta irina. Prestaketa: Frijitu zartagin batean bi baratzuri ale osorik, eta bertatik kendu gabe xolomoa frijitu ogi birrindutan pasata. Behin frijituta fuente luze batean jarri xolomoa. Olio berean tipula egin eta koilarakada bat irin bota. Pixkanaka sagardoa bota­tzen joan eta gatza bota. Saltsa egina dagoenean xolomoari gainetik bota eta zerbitzatu.

Nola lortu aplikazioa
Aplikazio hau deskargatzeko,  mugikorretik ´TXOTX` hitza 5195 zenbakira bidali behar da. ´Txotx gida 2010` jaisteko beste aukera, Gipuzkoako Sagardogileen Elkartean bertan , bluetooth bidez jaistea da, hau dohainik egin daiteke gainera.