Jose Ramon Chica PSE-EE alderdiko bozeramaileak prentsa ohar bidez azaldu du, Udala beste pauso bat ematera doala Atez Atekoari dagokionez, «orain hondakin bilketaren gestioaz arduratuko den enpresa bat sortu nahi du eta hernaniarren diruarekin erositako materialak emango zaizkio. Gainera, milioi bat euro gehiago eman beharko zaizkio diru-sarrera eta aurreikusitako gastuen arteko defizita kubritzeko». Enpresa horren harira zenbait zalantza azaldu ditu.
Langile kopuruari dagokionez, hala azaldu du: «Usurbilen eta Hernanin bilketarako 14 pertsona jartzea proposatzen da. Usurbilen egun, 6 pertsona aritzen badira, Hernanik bost aldiz biztanle gehiago baditu, eta 8 pertsona gehiago bakarrik hartu nahi badira, hori kontuan izanda, datuek ez diete beharrei erantzuten».
Azaldu duenez, enpresa publiko bat sortu nahi dute Usurbilekin eta Oiartzunekin batera eta gaineratu du proposatutako enpresa publiko horren aurrekontuetan ez direla inondik ageri lan-gileen oporrak, atsedenak, bajak... Dena dela, dio, «bitxiena» honakoa dela: «nola aukeratuko dira enpresako langileak? Denek izango dute aukera bera? Ziurrenik ´ingurumenaren alde` merituak egin dituztenek izango dute aukera». Eta gaineratu du: «jakin dezatela hernaniarrek sortuko duten ´enpresa publiko` horrek izango duen kostuaz gain, Udalak dagoeneko 700.000 euroko gastua duela materialagatik».
«Isunak eta kontrola»
Atez Atekoa orokorrean hartuta, honakoa azaldu du Chicak: «maiatzaren 9tik aurrera inposatu egingo digute eta birziklatzera behartuko gaituzte isunen bidez. Gainera, izendatzen den langileak ´inspektore` papera hartuko du eta aukera izango du gure basura kontrolatzeko eta herritarrok intimitaterako dugun eskubidea urratzeko».
«Gainera ez digute esaten zer egingo dugun birziklatu ezin diren hondakinenkin».
Sinadura bilketari babesa
Atez Atekoa martxan jarri aurretik herrian galdeketa egiteko eskatuz, egiten ari diren firma bilketari erreferentzia eginda, «dudarik gabe» babesa ematen diotela azaldu du Udalaren «burugabekeria» horren kontra.