Joan den astean, Ezker Abertzalearen prentsa oharrari erreferentzia eginda, honakoa azaldu dute EAJ-PNV eta Hamaikabat alderdiek prentsa ohar bidez: «Ezker Abertzalearen idatzia irakurri ondoren, jakin gabe jarraitzen dugu nora eramango diren azken kondarrak (errefusa)».
Eta gaineratu dute: «atez ateko bilketarekin hondakinen arazoa konpondu nahi izatea, egia ezkutatzea da». Adierazpen hori arrazoitzeko honako datuak eman dituzte: «Usurbilen, erraustegira edo zabortegira doazen kondar horien portzentaia apiriletik uztailera %27,24 izan zen; urrian %33,81; eta azaroan %42,14. Ez dago munduan herririk azken kondarra 0 denik. Denoi gustatuko litzaiguke utopia hori, baina errealitatea dena da: berrerabili edo birziklatu ezin ditugun hondakinak sortzen ditugula».
«Nabarmen geratu ziren Hernanin beste firma
bilketa bat egin zenean»
Erreferendumari dagokionez, honakoa azaldu dute: «Ezker Abertzaleak harro azaldu izan du beti jarrera parte hartzaileena duela eta herriaren ahotsa gehien errespetatzen duela. Baina nabarmen geratu ziren Hernanin beste firma bilketa bat egin zenean (Ertzaintzako errotonda eta Antziola auzoa lotzen dituen bidea ez egiteko). Ez zuten kasorik egin».
Eta hala jarraitu dute: «Edota hainbestetan aipatu izan diguten firma bilketa, Landarbaso edo Zubietan erraustegia ez jartzeko. Donostiako kokapenaz Hernanin galdetu? Guk ez genion zentzurik hartzen. Eta Marian Beitialarrangoitiaren udal gobernuak ere hala pentsatuko du, ez baitu halako galdeketarik egin, nahiz eta gehiengoa daukaten».
«Pentsatzen duzue ez garela erabakitzeko gai?»
Atez atekoari buruzko erreferenduma egiteko eskaerari dagokionez, azaldu dute: «Ezker Abertzaleak kasorik egingo ez duela esan ez ezik, non firmatu daitekeen adierazten duten paperak kentzen dituzte, plataforman parte hartzen dutenak mehatxatzen dira, eta abar. Herritarrak isildu behar al dira? Edo zenbaitek bezala pentsatzen duzue, ez garela erabakitzeko gai, eta teknikoak direla gugatik pentsatu eta erabaki behar dutenak?».