GAUR EGUN, egunero kaleratzen da Kronika, egunero 4.600 ale, eta bi orrialde astez, eta zortzi orrialde asteburuan. Sortu zenean astean bost egunetan kaleratzen zen, 1.750 ale, eta zortzi orrialdekorik ez. Zeinek ukatuko du aldaketa haundia eman duela Kronikak 2000 urte hartatik. Dena den, hasierako helburuek bere horretan jarraitzen dute: herritarrei ahalik eta informazio zabalena eta lehialena ematea, eta euskeraz.
Doberak sortua,
informazioa zabaltzeko eta euskera indartzeko
Dobera euskara elkarteak sortu zuen Hernaniko Kronika, eta bi helburu nagusi zituen: batetik, herriko informazioa herritarrei zabaltzea; eta bestetik, euskera indartzea.
Hasierako asmo haiek bere horretan jarraitzen dute gaur egun ere, eta Kronikak informazio gero eta zabalagoa eskaintzen die hernaniarrei, eta herritarrek euskeraz irakurtzen dute egunero-egunero.
Kronikak herritarrei begira egiten du lan, eta herritarrek emandako informazioa du iturri nagusia.
Informazio zabala
Kronikak era guztietako informazioa argitaratzen du, gizartea, politika, kirola, kultura... Talde eta alderdi guztien albisteak zabaltzen dira, herritar guztien intereseko produktua egiteko asmoarekin.
Hernanin egunero gertatzen dena irakurleari eskaini nahi dio Kronikak, politika, kolore eta gusto guztietako informazioa, alegia.
Sei langile finko
Proiektua aurrera ateratzeko, egunero 6 lagun ari dira lanean Kronikan, eta beste bat orduka. Kolaboratzaile sarea ere gero eta haundiagoa dauka Kronikak, eta momentu honetan erreportaje bereziak idazten eta bestelako lanetan laguntzen 10-12 bat lagun ari dira.
Egunero 4.600 ale doan
Hernaniko denda eta kioskoetan eskura dauka Kronika nahi duenak. Dagoeneko 4.600 ale banatzen dira erabat dohainik egunero, eta jendeak berak hartzen du Kronika.
Ale kopuruan igoera haundiena lehendabiziko hiru urteetan izan zuen Kronikak, baina azken urtean ere dezente igo da eskaria. 2000 urtean 1.750 ale banatzen ziren egunean, eta 2003an 3.500 inguru banatzen ziren. Gainerako urteetan, igoera polikiago joan da, baina etenik gabe. Azken urtean igoera nabarmena izan du Kronikak, eta iaz banatzen ziren 4.300 aletik, 4.600era pasa da; batez ere, dendek ale gehiago eskatzen dituztelako, eta zenbait denda berrik eskatu egiten dutelako Kronika.
Hamar urte horietan 3.300 zenbaki kaleratu dira; hasiera bost egunetan kaleratzen zen astean, gero 6 egunetan eta 2004az geroztik egunero.
Asteburuko Kronikak eta Kronika bereziak
Asteburuetako Kronikak gero eta landuagoak eta informazio gero eta garatuagoa eskaintzea da lan taldearen apustua. Horrez gain, astean zehar egun jakinetan Kronika bereziak ateratzen dira: Ikasleen Txokoak, Euskaltegien Txokoak, San Joan jaiak, Gabonak... Eta aurrera ere horretan jarraitzea da asmoa.
Gai berriak, formatu berriak, eremu berriak
Gai berriak bilatu, aztertu eta landu nahi dira egunetik egunera Kronikan, eta herritar askok izan dezaketen albiste, datu edo informazio interesgarri horri bidea egin nahi zaio. Arakatu egin nahi
da zenbait esparrutan (lan mundua, historia, gizarte alorretan...) eta gaur eguneko medioek eskaintzen dituzten aukerak ere aprobetxatu
nahi dira. Formatu berriak bilatu, koloreak sartu, itxura egokitu...
Hernanitik kanpoko informazioa ere eskaintzen du Kronikak, eta hala jarraituko du, interesgarria dena Hernanira ekartzeko asmoarekin. Horrela, Kronika, gaur egun, Topaguneko hedabideak biltzen dituen Tokikom taldeko partaide ere bada.
www.kronika.net
Egunero Kronika internet bidez irakurtzen dute 650 lagunek. Papereko informazioaz gain, momentuan momentuko informazioa, eta beste zerbitzu batzuk eskaintzen ditu Kronikaren edizio digitalak.