Hernani BHIko Zuzendaritzak prentsa oharrean iritzia azaldu du, ikastetxeen fusioari buruzkoa. Prentsa oharrean dioenez, «gaia ez da erraza, gehienetan zailtasunak bakarrik ikusten ditugulako: hezkuntza proeiktuen aldaketak (lan metodologiak, ikas materialak, gurasoen parte hartzea...), azpiegiturak, administrazioaren benetako konpromezua baliabideak ematerakoan... eta guzti honen aurrean Lehen Hezkuntzako 6. mailako gurasoek erabaki bat hartu behar!».
«Eskola plangintzaren gaia aspaldikoa da; Hernani BHI bera horren isla da»
Zuzendaritzaren iritziz, eskola plangintzari buruz azkenaldian gauza asko irakurri eta entzun dira; batzuk «erabat errespetagarriak, bakoitzak bere ideiak defendatuz errespeto osoz argudiatutakoak, eta beste batzuk berriz, ez hain defendagarriak ez jakintasunean eta aurreiritzietan soilik oinarritutakoak».
Eskola plangintzaren gaia aspaldikoa dela dio Hernani BHIko zuzendaritzak. «Eskola Mapa diseinatu zenekoa hain zuzen, eta horren isla da gaur egungo Hernani BHI bera; Agustin Iturriaga eta Karmelo Labaka bateratu ziren, baina orduan Administrazioak hartu zuen erabaki politikoak egungo panorama utzi digu».
Oraingo prozesuari dagokionez, Hernani BHIk prozesuan buru-belarri sartzea erabaki zuen, «Administrazioak hala eskatuta, eta klaustroan hausnarketa serio bat eginda, eta bukaeran adostu zen dokumentua Eskola kontseiluan onartu zen».
«Proiektu serioa, integratzailea eta berritzailea nahi dugu»
Prozesua zaila izango dela garbi ikusten du Hernani BHIk baina, garbi dauka aurrera egin nahi duela, «Hernaniko Bigarren Hezkuntzarako proiektu serioa, integratzailea eta berritzailea nahi dugu, eta egungo prozesua sustatuko dugu, helburu horrekin».
Bukatzeko, diote: «Azken finean, ikastetxeetako Hezkuntza Proiektuak, guztiak, dinamikoak eta biziak dira».