otsailak 4, Santa Ageda bezpera, urteroko moduan ospatuko da aurten ere Hernanin. Herriko elkarte, abesbatza eta ikastetxeek entsaioak izan dituzte azken egunetan, eta dena prest dute ostegunerako. Santa Ageda martiriaren omenezko eguna otsailaren 5a da, eta ohitura da, bezperan, otsailaren 4an, santaeskea egitea, herriko etxe eta tabernetan barrena. Ageda martiriaren istorioa kontatzen da kantuan, eta gutxi dira herri honetan, ohitura hori bezain zaharrak eta zabalduak daudenak.
Talde bat baino gehiago
Ohitura Zaharrak abesbatzak urte asko eta asko daramazki Santa Ageda erronda egiten. Aurten ere, badute asmoa, eta 18:30etan aterako dira, Milagrosatik.
Ereñotzuko Ur-Mia elkarteak 16:30etan egin du zita, elkartean bertan.
Kantuz abesbatza 19:30etan aterako da Milagrosatik.
Goiz Eguzki abesbatza 17:00etan abiatuko da Sandiusterri egoitzatik.
Kantu-paperak eta makilak, Plaza Berrira inguratzen direnentzat
Santa Ageda erronda Plaza Berrira iristen denean, kantu-paperak eta makilak banatuko zaizkie inguratzen direnei, momentu batez, Santa Agedako kantak denen artean kantatzeko, 19.45ak aldean izango da.
Ohitura Zaharrak abesbatzak egin du aurten deialdi berezi hori. Taldeari 1993an jarri zioten izen hori, baina askoz lehenagotik ari ziren Santa Agedako erronda egiten: «taldeko batzuk, aurten 50 urte egingo dituzte santaeskean ateratzen direla. Ohitura gutxi dira herri honetan hainbeste urte iraun dutenak. Aurten zerbait berezia egin nahi izan dugu».