udaleko ingurumen sailak eta Hernaniko 90 dendarik elkarlanean bultzatutako poltsak berrerabiltzeko kanpaina bigarren fasean sartu da urtea hastearekin batera. Eta orain, otsailetik aurrera, bezeroak eskatzen dituen poltsa bakoitzeko bost zentimo ordaindu beharko ditu. Ingurumen sailetik azaldu dutenez, edozein materialetako poltsak kobratuko dituzte: «paperezkoak, plastikozkoak, telazkoak... edozein poltsa, dena bihurtzen baita hondakin. Asmoa da jendeak bere etxetik eramatea poltsa». Eta gaineratu dute: «ez da poltsak ordaintzeko zigor bat, ingurumenari kalte egiteagatik baizik».
Zabor tasan %30eko bonifikazioa
Ingurumen sailak jakinarazi du gainera, kanpaina honen barruan dauden merkatariek %30eko bonifikazioa izango dutela zabor tasan. Egun 90 denda daude poltsen kanpainan sartuta eta hasieran egin bezalaxe, komertzio guztiei luzatuko diete parte hartzeko aukera. Parte hartzen duten dendek badute horren marka.
Aurreneko kanpaina
«oso positiboa»
Poltsak berrerabiltzeko kanpaina 2009an jarri zen martxan helburua izanda plastikozko poltsak kaletik kentzea. Eta hori bultzatzeko, bonoen zozketako kanpaina egin zen urte osoan zehar. Merkatari gehienek esan dute plastikozko poltsen erabilera jaitsi dela eta kanpainaren bultzatzaileak oso pozik daude. «Lan gogorra izan da, baina erantzuna ikusita oso positibotzat hartu dugu. Denda batzuetan esan digute 1/3 jaitsi dela poltsen erabilera eta beste batzuetan gehiago ere bai».