EUSKO Jaurlaritzak hala erabakita, datorren ikasturtetik aurrera, Hernaniko ikasle gehienek batera egingo dituzte Derrigorrezko Bigarren Hezkuntzako ikasketak. Lehen 16 urterekin nahastu eta elkarrekin ikasten zutenak, orain 12 urterekin elkartuko dira, elkarrekin ikastera.
Otsailean izena eman,
irailean hasi
Asmoa da, datorren ikasturtean bat eginda izatea herriko Derrigorrezko Bigarren Hezkuntzako lehendabiziko mailak, 2010eko irailetik aurrera. Erabateko fusioa, hurrengo urteetan egingo da, eta Batxilergoa eta Heziketa Zikloak ere proiektu beraren barruan sartuko dituzte. Datorren ikasturterako izen ematea otsailean egingo da, beraz, matrikulazioa bateratua izango da.
Ikastetxe bakoitzak
bere DBHa orain arte
Aspalditik zetorren kontua zen bateratzearena. Tartean bilera mordoska eta Gasteizko gobernu aldaketa ere izan dira. 2009eko irailean, Eusko Jaurlaritzako Hezkuntza Sailak berriz ekin zion Eskola Mapa berraztertzeari.
Euskal Autonomi Erkidegoko Eskola Mapan aldaketak egiten ari da Hezkuntza Saila, eta Derrigorrezko Bigarren Hezkuntza eta Batxilergoak bateratzeko prozesua jarri du martxan. Horren harira, bere ardurapean dauden zentro guztiekin berrantolaketa egin nahi du, baita Hernanikoekin ere.
2008/09 ikasturteko datuen arabera, Inmakulada ikastetxeak 94 ikasle izan zituen DBHn, Hernaniko DBHko ikasleen %16; Urumea Ikastolak 135 ikasle, %23; Langile Ikastolak 218 ikasle, %37; eta Elizatxo Ikastolak 133 ikasle, % 23. Guztira 581 ikasle zeuden joan den urtean DBH egiten herriko ikastetxeetan.
«Eskaintza hobetzeko egina»
Gipuzkoako Hezkuntza Lurralde Ordezkaritzatik Kronikari jakinarazi diotenez, Hernaniko eskaintza hobetzeko hartu dute erabakia, batez ere: «Hernani herrian Bigarren Hezkuntzako eskaintza hobetzeko. Eskaintza osoago bat eta egituratuago bat egin ahal izateko».
Bi urte bilerak egiten
Prozesuak beraz, gora behera haundiak izan ditu, baita geldialdiak ere. Hala ere, aspalditik zetorren kontua da; zehatz esanda, 2004-2005 ikasturtetik. Ikastetxe guztietako ordezkariak, hezkuntza administrazio eta udaletxeko ordezkariak bildu ziren bileretan, eta bi batzorde osatu ziren: batetik, Batzorde Pedagogikoa, Hezkuntza Proiektuaren inguruan lanean aritu zena. Eta bestetik, Batzorde Teknikoa, bitartekoekin lotutako aspektuak landu zituena.
Hausnarketa prozesu luzea izan zen eta makina bat bileraren ondoren, ikastetxe batzuk bateratzearen alde azaldu ziren, eta beste bat ez, zehazki Langile ikastola, «ez behintzat baldintza haietan». Azkenean, Eusko Jaurlaritzak bateratze prozesuarekin aurrera jarraitzea erabaki du.
«Hezkuntza proiektua
garatzen joan behar da»
Institutu berriak zein Hezkuntza proiektu izango duen galderari honakoa erantzun dio, Donostiako Hezkuntza Delegaritzak: «Hezkuntza Proiektua garatzen joan behar da. Horretarako lan talde bat jarriko da martxan hori eraikitzeko. Lana hasia dago, aurreko urteetan Batzorde Pedagogikoak landutakoa oinarritzat hartuta jarraitu behar da proiektua osatzen. Lan talde horretan irakasle eta gurasoek parte hartuko dute, eta behar izanez gero, aditu batzuk ere bai. Helburua ikastetxe bakoitzak dituen gauza onenak baliatuz, denontzat proiektu on bat egitea da».
«Hernanin behin betiko destinoa duten irakasle guztiak ariko dira»
Hezkuntza sailaren esanetan, Bigarren Hezkuntzako ikastetxe bat izango da. Bigarren Hezkuntza osoa eskainiko duena, hau da, DBH, Batxilergoa eta Lanbide Heziketako ikasketak, «horrelakoak dira Bigarren Hezkuntzako ikastetxe gehienak».
«Irakasleria izango da, oraingo lau ikastetxeetan dagoena. Berez, egun Hernanin behin betiko destinoa duten irakasle guztiak arituko dira, orain bezala».
Agustin Iturriaga, Karmelo Labaka,
Santa Barbara,
eta eraikin berri bat
Azpiegitura aldetik, oraingo hiru eraikin eta beste berri bat izango ditu proiektuak. Batetik, Agustin Iturriaga eta Karmelo Labaka eraikinak; bestetik, Santa Barbara eraikina; eta azkenik, eraikin berri bat, gimnasio, jangela, eta zerbitzu osagarrirako espazio batzuk izango dituena (teknologia gelak, plastika gelak, eta abar).
Hiru urtetan egingo da fusioa
Hiru urte beharko dira prozesu osoa egiteko. Honakoa jakinarazi du Hezkuntza sailak: «Dagoeneko zuzendaritza taldeak elkarrekin lanean ari dira. Maiatzerako gurasoekin beste bilerak egingo dira gauzak gehiago zehazteko: hurrengo ikasturterako DBHko 1go mailako antolaketaren berri emateko».
«Ikasleei dagokienez, onarpen prozesu bateratua egingo da, hau da, otsailean izena eman behar dute: datorren ikasturtean DBHko 1go mailan arituko diren ikasleek».
Ikastetxe batek ez badu fusio horretan sartu nahi, aukera dauka bere kabuz jarraitzeko?
Hezkuntza Delegaritzak argi eta garbi erantzun dio Hernaniko Kronikari, fusioan sartu behar dutela Hernaniko ikastetxe publiko guztiek:
«Ikastetxeen sarea antolatzea Hezkuntza Sailaren erantzunkizuna da. Berari dagokio ezartzea eta finkatzea zenbat eta zer motatako ikastetxe publikoak martxan jarri behar diren, ikastetxe bakoitzak zenbat eskola plaza izan behar dituen... Beraz, hemendik aurrera Hernaniko Bigarren Hezkuntzako eskaintza publiko bakarra izango da Hernanin».
Gipuzkoako Hezkuntza lurralde Departamendua:
«Bat egitea progresiboki egingo da»
Hezkuntza Departamenduaren esanetan, bat egitea progresibokik egingo da: · 2010-2011 ikasturtean DBHko 1go mailako ikasleak elkartuko dira eta Agustin Iturriagan egongo dira. 2-3-4 mailakoak oraingo eraikinetan jarraituko dute. · 2011-2012 ikasturtean DBHko 1go mailako ikasleak elkartuko dira. 2garren mailakoak jada elkartuta daude, Agustin Iturriaga eraikinean, eta DBHko 3-4 mailakoak oraingo eraikinetan jarraituko dute. · 2012-2013 ikasturtean maila guztietako ikasleak elkartuko dira. 1-2-3 mailakoak Santa Barbara eraikinean ariko dira, eta DBHko 4garren mailakoak eta Batxilergokoak Agustin Iturriaga eraikinean. · Batxilergoko ikasleak beti Agustin Iturriaga erakinean ariko dira, eta Lanbide Heziketakoak Karmelo Labakan.
Ze iritzi dute Hernaniko ikastetxeek fusioari buruz?
LANGILE IKASTOLA
«Batetik, ez dute emandako hitza errespetatu, eta bestetik Langile Ikastola suntsitzen du inposizio horrek»
«2005ean Hezkuntza Delegazioak herriko ikastetxe publiko guztioi 12-16 ikastetxe bateratu bat sortzeko proposamena egin zigun, eta bi urtez iraun zuen prozesu horretan, irakasle eta gurasoz osatutako lan batzordean gogor egin zen lan, ikastetxe bakoitzaren hezkuntza proiektua aztertuz, gutxienezko adostasun batzuetara iristeko helburuarekin. Hezkuntza Delegazioak hitz eman zuen prozesua hasi aurretik lan horren emaitza errespetatuko zuela.
Baina herriko ikastetxe publikoak oso hezkuntza proiektu desberdinak ditugu, era oso desberdinean ikusten dugu irakaskuntza, eta bi urteko lan guzti horren ondorioa izan zen: ez zegoela adostasun nahikorik aurrera egiteko.
Bi urtez fusioaren berririk eduki gabe egon ondoren, 2009an erabateko inposizioa eta erasokorra den agindua eman du Hezkuntza Delegazioak, hala nola 2010/2011 ikasturtetik aurrera 12-18 urte bitarteko fusioa gauzatuko dela, nahiz eta inolako proiekturik gabeko eskola jarri nahi duten martxan, eta elkarrekin egon nahi ez dugun komunitateak elkarrekin egotera behartzen gaituztela.
Batetik, ez dute emandako hitza errespetatu, bestetik Langile Ikastola suntsitzen du inposizio horrek, 2-16 ikastetxe sendo eta indartsu bat delako, inolako ihesik gabe, lan koordinatu bat duen hezkuntza proiektua delako, pedagogikoki eta konpromiso aldetik sinesgarritasun handia duena. Oso parte hartzailea, eta nabarmenki aukeratua dena Hernaniko guraso gehienen aldetik, eta azkenik, Administrazioak bere interes propioak gailendu nahi ditu gutxieneko zehaztasunik ez duen proiektu batean hezkuntza bera kinka larrian jarriaz.
Arrazoi guzti horiek direla medio, eta proiektu hori aurrera ateratzeko abiapuntu hau oso txarra dela kontsideratzen duelako, Langile Ikastolak oraindik ere ezetz esaten dio fusioari. Gure seme-alabei heziketa eredurik onena eskeini nahi diegu, eta horrelako proiektu bat martxan jartzeak, eskatzen du, gutxienez, denbora eta lan sakonago bat adostasun batzuetara iristeko, eta denok ilusiotik hasteko, eta ez inposiziotik. Inposizioaren bideak ez du amaiera onik izaten eta».
ELIZATXO IKASTOLA
«Fusioak Hernaniko Bigarren Hezkuntzako eskola mapa razionalizatzen du, herriari ikastetxe publiko sendo bat eskainiz»
«Lehenik aipatu behar dena zera da, Hezkuntza Delegazioak, Lege Biltzarrean onartutako Eskola Mapa berria dela eta, Hernanirako proposatzen duena Bigarren Hezkuntzako Institutu berri bat dela, gaur egun dauden Bigarren Hezkuntzako ikastetxe publiko guztien fusiotik sortuko dena. Hau da, DBHko 3 ikastetxeak (Elizatxo BHI, Langile BHI eta Urumea BHI) eta Batxilergo eta Heziketa Zikloko Hernaniko Institutua.
Orain dela lau edo bost urte hasi zen ikastetxeen elkartze prozesu honetan, Elizatxo BHI ikastetxearen iritzia (Klaustroa, Ikastetxeko Organo Gorena eta Gurasoen Asanblada) beti fusioaren aldekoa izan da. Hausnartzen hasita, honakoak dira gure artean indar gehiagorekin agertzen diren arrazoiak:
· Planteatzen den fusioak Hernaniko Bigarren Hezkuntzako eskola mapa razionalizatzen du herriari ikastetxe publiko sendo bat eskainiz. Bertako ikasleek DBH eta batxilergoa ikastetxez aldatu gabe egiteko aukera edukiko dute.
· Ikastetxe berriaren tamaina handiegia izan gabe (askoz handiagoak diren ikastetxe publikoak badaude Donostian bertan) ibilbide edukatibo gehienak eskaintzeko aukera bermatuko du: batxilergo modalitate desberdinak, dibertsifikazio curricularra behar duten DBHko ikasle guztientzako eta abar.
· Baliabide aldetik ere, ikastetxe berriak (bere kokapena Hernani Institutua eta Santa Barbarako egoitzetan izango du) oraingoak baino instalazio hobeak eskainiko dizkie herriko ikasleei: gimnasioa ikastetxean bertan, jangelak (gaur egun herriko DBHko bi ikastetxe jangelarik gabe daude), frontoi bat eta abar.
· Ikastetxe berriaren hezkuntza proiektuari dagokionez, bistakoa da gaur egun dauden 4 ikastetxeetatik sortu behar den proiektua dela, eta denak sare publikoko ikastetxeak izanik, kalitatezko hezkuntza ari gara jadanik eskaintzen. Beraz, gugandik sortzen den horrek, guztien aportazioa jasota, orain arte dagoena bezain ona edo hobea izan behar du nahi eta nahiez; ahaztu gabe, proiektu berriak okasio ezin hobea eskaintzen digula gure hezkuntza proiektua bultzada berri batez hobetzeko».
Urumea ikastolak eta Hernani Institutuak datorren astean emango dute iritzia