GUTXI gorabehera, Hernaniko 700 familiek egin behar dute bere seme-alaben matrikulazioa. Zein dira? Ikastetxeetan hiru ziklo izaten dira, adinen arabera: Haur Hezkuntza (2-6 urte); Lehen Hezkuntza (6-12 urte); Derrigorrezko Bigarren Hezkuntza (12-16 urte). Ba, hain zuzen ere, ziklo bakoitzean lehenengo aldiz sartu ahal izateko, matrikulatu egin behar da: alegia, 700 familia dira kasu horretan daudenak (800 bat ikasle). Eta... non matrikulatu haurrak? Hernanin 5 ikastetxe dituzte aukeran: Langile ikastola, Urumea ikastola, Elizatxo ikastola, Inmakulada ikastetxea eta Txirrita ikastetxea (Ereñotzu). Matrikulazioa bihar irekiko da, eta otsailaren 12ra arte izango da ikastetxeetan matrikula egiteko aukera.
Aukera zabala herrian bertan
Hernaniko 5 ikastetxeek aukera zabala eskaintzen duten, hezkuntza proiektu bat edo beste aukeratu nahi duenarentzat. Lau ikastetxe publiko daude: Langile, Urumea, Elizatxo eta Txirrita; eta ikastetxe kontzertatu bat: Inmakulada.
Inmakuladak, Urumeak, Elizatxok eta Langilek, 2 urtetik 16 urtera bitarteko eskaintza daukate, eta Ereñotzuko Txirrita ikastetxeak 2 urtetik 12 urtera bitartekoa.
Datorren ikasturtean, 3 ikastola publikoek bat egingo dute, 12-16 urte bitarteko ikasketak egiteko, Jaurlaritzako Hezkuntza Sailak hala erabakita.
2.400 ikasle Hernanin
matrikulatuak,
aspaldiko gehiena
Hernaniar gehienek herrian matrikulatzen dituzte beren seme-alabak, baina badira inguruko herrietara eramaten dituztenak ere: %13 inguru.
Azken urteetan, igo egin da matrikulazioa Hernaniko ikastetxeetan, 2.008 ikasle ziren orain dela 9 urte, eta aurten 2.400 ikasle dira, 2-16 adin tartean ikasten ari direnak. Hor, kontuan hartu behar da jaiotze tasa ere asko igo dela urte horietan. Baina azken bi urteetako datuak kontuan hartuta, 2007-08 ikasturtean 2.258 ikasle ari ziren Hernanin ikasten, eta adin tarte horretan zeudenak guztira, 2.795 ziren. Aurten berriz, 2.400 ikasle ari dira Hernanin ikasten, eta guztira 2.713 dira.
Hernanin ikasteak dituen abantailak azpimarratu ditu Hernaniko Udalak
Hernaniko Udalak kanpaina jarri du martxan, Hernanin matrikulatzeak dituen abantailak azpimarratzeko. Herrian Bizi, Herrian Ikasi izena du kanpainak, eta asmoa da, hernaniarrak animatzea, semea-alabak herrian matrikulatzera.
Hiru ideia azpimarratu dituzte, batez ere, kanpainan. Hernanik eskaintzen duena: aukera zabala eta anitza dela; kalitatezko eskaintza dela; eta abantaila asko dituela.
Merkeagoa, erosoagoa, bertakoagoa... eta herriarentzako ere aberasgarria da beraz, haurrak herrian matrikulatzea.
Herrian ikastearen abantailak
l Merkeagoa da. Oinez edo bizikletaz joateko aukera dago.
l Erosoagoa da. Denbora gutxiago behar da denerako.
l Seme-alaben heziketa gertuagotik jarraitu leike.
l Ikastetxeko dinamikan parte hartzeko aukera haundiagoa da.
l Seme-alabak herrian integratzeko erraztasun haundiagoa dute.
l Herriko jarduera eta zerbitzuak eskura: kiroldegia, liburutegia,
Eskola Kirola egitasmoa, musika eskola....
l Herriarentzat aberasgarria da.
2001etik honako matrikulazioa (2-16 urte)
- 2001-02: 2.008 ikasle
- 2002-03: 2.019 ikasle
- 2003-04: 2.018 ikasle
- 2004-05: 2.044 ikasle
- 2005-06: 2.123 ikasle
- 2006-07: 2.190 ikasle
- 2007-08: 2.258 ikasle
- 2008-09: 2.306 ikasle
- 2009-10: 2.400 ikasle