Urtero egin ohi duen bezala, San Joan Konpartsak gai bat aukeratzen du San Joanetan karroza bat ateratzeko. Buruari buelta pare bat eman ondoren, aurten Oialume Dantza Lekuari buruz egitea erabaki dute. 1943. urtean zabaldu zuten Hernaniko Martindegi auzoan zegoen erromeria-leku hori, apustu baten ondorioz, eta etengabe aldatuz joan den gizarte baten lekukoa izan da. Berbena talde asko pasatu da bertatik baina gazte jendearen beharrei kasu eginez, hilero, bi igandetan musika diskoa jarri behar izan zuten azkenean. Lekukoek diotenez, hasiera batean, trikitilari itsu bat izaten zen hura girotzen eta 1,5 peztaren trukean egiten zuten dantza nahikoa garaiko gazteek. Ondoren zozketa txiki bat izaten omen zen sarrera ordaintzen zuten guztien artean. Saria oilo parea, arkumea edo asto kume bat ere izan omen zen. Hainbeste urteetako erromerietan dozenaka bikotek elkar ezagutu zuten bertan.
San Joan Konpartsak badaki, horrelako istorio mordo bat badagoela 60 urte baino gehiago bete zituen dantza leku baten atzean. Horregatik, San Joanetako karroza errealitatera ahalik eta gehien gerturatzeko asmoz, informazioa, argazkiak edo anekdota pertsonalen bila dabil. Hori dela eta, gai hau aurrera ateratzen lagundu dezaketen Hernaniko eskualdeko pertsona guztiak, otsailaren 2an arratsaldeko zazpiretan Biteri Kultur Etxean ospatuko den bilerara gonbidatzen ditu.
Bestetik, dantzalekuaren inguruko garai bateko argazkiak dauzkatenek edo lor ditzaketenek, Udaleko Artxibora (goizez) edo Biteri Kultur Etxera (egun osoz) jo dezakete. San Joan Konpartsak argi utzi nahi du, argazkiak itzultzea beraien eginkizuna izango dela.
Urteko batzarra asteazkenean
San Joan Konpartsak urteroko bilera egingo du asteazkenean, hau da, urtarrilaren 27an, arratsaldeko zapiretan Biteri Kultur Etxean. Ohitura den bezala, jendeari bertara azaltzeko deia egiten dio urteroko kontuetaz hitz egiteko.