Eeuskal Preso Politikoen Kolektiboan dauden presoek borrokaldia hasi dute euren baldintzak salatzeko, eta atzo, Amnistiaren Aldeko Mugimenduek, prentsaurrean, euren babesa adierazi zien kolektiboan dauden preso guztiei, «hasi berri duten borrokaldian aritzeko beharko duten indarra, maitasuna eta kemena». Horrez gain, prentsaurrekoa eman zuten 30 bat pertsonek, oraingo espetxe politika salatu eta aldatzeko eskatu zuten.
«Azken urteetan baldintzak okertu egin dira»
Preso politikoek hasi duten borrokaldian beraiekin daudela adierazi zuten atzoko agerraldian, eta gaineratu zuten, «jakina da, azken urteetan muturreko egoerak areagotu egin direla. Kondenak luzatu dira, gaixo larriak giltzapean mantentzen dituzte, isolamendua areagotzen diete... Bizi baldintza duinetik oso urrun daude, eta hala ere, tinkotasuna eta kemena erakusten dute. Beraien ekarpena egiten dute gainera, Euskal Herrirako prozesu demokratiko bat ekarri ahal izateko».
«Gatazkaren parte eta ondorio»
Atzoko agerraldian aldarrikatu zuten, presoen kolektiboak izaera politikoa duela, presoek bezala. «Gobernuek ez dute hori aldarrikatzen, baina beraiei espreski zuzendutako politika aplikatzen die. Eta gatazkaren parte eta ondorio diren neurrian, konponbidearen parte eta ondorio ere izan beharko dute nahi eta nahi ez».
Kartzela politika aldatu
Egungo kartzela politika aldatzeko eskaera egin zuten, «suntsitzailea eta murriztailea izatetik, eskubideetan oinarritua izatera igaro behar du». Horretarako konpromiso kolektiboen etapa berria zabaldu behar da Euskal Herrian, AAMren ustez, helburu argi batekin: «presoak Euskal Herrian izan daitezen, beraien eskubideen alde».
Eskubide horiek bermatu daitezen, beharrezkoa dela diote sektore politiko, sozial, eta norbanakoen bultzada eta konpromisoa.
«Bukatzeko, gogora ekarri nahi dugu, Gatzak espetxean 30 urte betetzen dituela. Nelson Mandelak 27 egin zituen, eta ankerkeria onartezin bezala jo zuten ospe haundiko erakunde eta adituek. Gatzak oraindik barruan jarraitzen du. Bera askatzea irmoki aldarrikatzen dugu».