peio Lozano EHUko irakaslea eta ingurugiro antolamenduko aditua izango da datorren asteartean Hernanin, Biteri kultur etxean, arratsaldeko 20:00etan. Erraustegiari buruz hitz egingo du Lozanok Biterin, Hernaniko Zero Zabor taldeak antolatuta.
Zer jakin nahi zenuke erraustegiaren inguruan? jarri diote izena hitzaldiari, eta asmoa da, Zubietan jarri nahi den erraustegiari buruz informazioa ematea hernaniarrei. Zero Zabor taldeak prentsa oharrean dioenez, «Zubietan (Hernanitik 5km-ra) eraiki nahi duten erraustegiaren inguruan dagoen informazio eskasia dela-eta antolatu dugu hitzaldia».
Lozano aditua da ingurugiro antolamenduan, eta lehen ere hitzaldi asko eman ditu erraustegiari buruz.
Galdera asko
Zer behar du erraustegiak ondo funtzionatzeko? Zer kalte eragin ditzake? Inguruan martxan diren erraustegiek nola funtzionatzen dute?... asko izan litezke galderak, eta Lozanok horiek edo jendeak egindako beste asko erantzungo ditu asteartean Biterin.
Bestalde, asteartea baino lehenago ere galdera egitea badago Lozanori, eta hark hitzaldian erantzungo ditu. Horretarako, Zero Zabor taldeak e-mail bat jarri du, eta herritarrak animatu nahi ditu aldez aurretik galderak egitera: zerozabor@gmail.com. Horrez gain, Lozanok emandako beste hitzaldi baten bideo pasarte batzuk jarri ditu Zero Zabor taldeak bere web orrian, jendeak ikusi ditzan: www.zerozabor.ning.com.